Ənsarullah: Səudiyyə Ərəbistanı ilə danışıqlar davam edir

Yəmənin Ənsarullah Hərəkatının siyasi bürosunun üzvü Səudiyyə Ərəbistanı ilə danışıqların davam etdirilməsinə təkid edib.

 “Ənsarullah” hərəkatının siyasi ofisinin üzvü Əli Əl-Qahum Ər-Riyadla danışıqların davam etdirilməsini vurğulayıb.

Əli Əl-Qahum Ər-Riyadla danışıqların davam etdiyini və Omanlı vasitəçinin danışıqlarda irəliləyişə nail olmağa çalışdığını bildirib.

Əl-Məyadin-ə verdiyi müsahibədə o, humanitar işlərdə çıxılmaz vəziyyətin hava limanlarının, dəniz limanlarının yenidən açılması və işçilərin maaşlarının ödənilməsi ilə bağlı olduğunu deyib.

Əl-Qahum həmçinin, bildirib ki, Səudiyyə Ərəbistanı təcavüzkar ərəb koalisiyasına rəhbərlik edir və bu ölkənin artıq sülhsevər bir tərəfə çevrilməsinin vaxtı çatıb.

Ötən aprelin sonunda Səudiyyə Ərəbistanı Xarici İşlər Nazirliyi bildirmişdi ki, Ər-Riyadın danışıqlar qrupu Sənaya səfəri zamanı onun rəsmiləri ilə görüşüb və hərtərəfli siyasi həllin əldə edilməsi istiqamətində ciddi, dərin və şəffaf müzakirələr aparıb.

Səudiyyə Ərəbistanının başçılıq etdiyi ərəb koalisiyası 2014-cü ilin aprelində Yəmənin istefa vermiş prezidenti Əbdurəbbih Mənsur Hadini hakimiyyətə qaytarmaq bəhanəsi ilə bu ölkəyə hücuma başlayıb. Bu müharibədə yüz minlərlə yəmənli həlak olub və ölkənin iqtisadiyyatına on milyardlarla dollar ziyan dəyib.