3 min ildən çox yaşı olan sirli keçidlər aşkarlanıb

Arxeoloqlar Peruda And dağlarının ətəyində üç min ildən çox yaşı olan məbəddə bir-biri ilə əlaqəli keçidlər aşkar ediblər. And dağlarının şimalında yerləşən “Chavin de Huantar” məbədi vaxtilə sakinlər üçün dini və inzibati mərkəz olub. 

Publika.az bunu xarici KİV-lərə istinadən xəbər verir.

Qazıntını həyata keçirən arxeologiya qrupunun üzvü Stanford Universitetindən Con Rik keçidlərin may ayının əvvəlində aşkar edildiyini və bu keçidlərin məbədin labirint qalereyalarından əvvəl tikildiyinə dair əllərində dəlillər olduğunu ifadə edib. 

Rik qeyd edib ki, bu yaxınlarda tapılan keçidlər əvvəllər kəşf edilənlərdən tikinti texnikası baxımından çox fərqli xüsusiyyətlərə malikdir.

Qeyd edək ki, And dağlarının ətəklərində uzun illər aparılan qazıntılar eramızdan əvvəl 1200-200-cü illər arasında tikildiyi təxmin edilən 35-dən çox bir-birinə bağlı yeraltı keçid şəbəkəsini aşkara çıxarıb.

Xatırladaq ki, paytaxt Limadan 250 kilometr aralıda yerləşən “Chavin de Huantar” məbədi 1985-ci ildə YUNESKO-nun Ümumdünya Mədəni İrs siyahısına daxil edilib.

Publika.az