İnqilab Rəhbəri Belarus Prezidenti ilə görüşdə: ABŞ-ın sanksiya tətbiq etdiyi ölkələr bu taktikanı aradan qaldırmaq üçün birlikdə çalışmalıdırlar

Həzrət Ayətullah Xamenei deyib: ABŞ tərəfindən sanksiyaya məruz qalan ölkələr sanksiya taktikasını aradan qaldırmaq üçün birgə fəaliyyət göstərməli və ortaq bir qrup yaratmalıdırlar və biz bunun mümkün olduğuna inanırıq.

İslam İnqilabının Rəhbəri Həzrət Ayətullah Xamenei bu gün (bazar ertəsi) axşam saatlarında Belarus Prezidenti Aleksandr Lukaşenko və onu müşayiət edən nümayəndə heyəti ilə görüşündə iki ölkə arasında əməkdaşlığın indiki səviyyədən çox-çox yüksək olduğunu etiraf edib və vurğulayıb:

Razılaşmaların həyata keçirilməsi üçün hər iki tərəfdə mövcud olan ruhiyyə və iradədən istifadə etməklə münasibətlərin səviyyəsi xeyli yüksəldilməlidir.

O, İran və Belarus arasında bir çox ortaq cəhətlərə toxunaraq, bu ortaq cəhətlərdən birini Amerika və bəzi Qərb ölkələrinin zorakılıq sanksiyaları adlandırıb və əlavə edib:

ABŞ-ın sanksiyasına məruz qalan ölkələr bir-biri ilə əməkdaşlıq etməli və sanksiya taktikasını aradan qaldırmaq üçün birgə qrup yaratmalıdırlar və inanırıq ki, bunu etmək olar.

İslam İnqilabının Rəhbəri ABŞ-ın inqilabın qələbə çalmasının başlanğıcından və son on iki ilin ən sərt sanksiyalarının tətbiqindən bu yana İrana qarşı sanksiyalarına toxunaraq qeyd edib:

Şiddətli sanksiyalar İranı öz daxili imkanlarını və qüvvələrini dərk etməyə yönəltdi və bu müddət ərzində sanksiyalar İran üçün bir çox inkişaflara zəmin yaratdı. Ölkəmiz müxtəlif sahələrdə, o cümlədən, “elm və texnologiya”, “tibb və bioloji”, “hava-kosmos”, “Nüvə” və “Nano” sahəsində nəzərəçarpacaq irəliləyiş əldə etdi.

Həzrət Ayətullah Xamenei vurğulayıb: Əgər ABŞ tərəfindən sanksiyaya məruz qalan ölkələr bir-birinin imkanlarından tam istifadə etsələr, bu, bütün tərəflər üçün böyük fayda verəcəkdir.

O, İran və Belarus arasında “elm və texnologiya”, “ticarət” və “beynəlxalq forumlarda siyasi fəaliyyətlər” daxil olmaqla əməkdaşlıq sahələrini xatırladıb, Şimal-Cənub nəqliyyat xətti məsələsinə işarə edərək deyib:

Şimal-Cənub tranzit xəttinin yaradılması hər iki ölkənin, eləcə də Rusiyanın və regionun marağındadır və hər iki tərəf onun yaradılmasına çalışmalıdır.

İslam İnqilabının Rəhbəri qeyd edib: “Razılaşmalar və sözlər görüşlərlə bitməməli, xüsusi təqib və konkret vaxtla həyata keçirilməlidir.”

İslam İnqilabının Rəhbəri bu gün də dünyanı mənəviyyata möhtac hesab edərək buyurub: Mənəviyyat xalqlar üçün hərəkətverici amil ola bilər.

Prezident İbrahim Rəisinin də iştirak etdiyi bu görüşdə Belarus Prezidenti Lukaşenko İnqilab Rəhbəri ilə görüşdən böyük məmnunluğunu ifadə edərək deyib:

Mən İrana sizi əmin etmək üçün gəlmişəm ki, iki ölkə arasında münasibətlərdə yeni səhifə açmaq əzmindəyəm və İran Prezidentinin əməkdaşlığı və iradəsi ilə biz bütün razılaşmaları xüsusi təqib və konkret vaxtla həyata keçirəcəyik.

Belarus Prezidenti vurğulayıb: “İran İslam Respublikası sanksiyalar dövründə heyrətamiz təcrübə və tərəqqi əldə edib və inanırıq ki, sanksiya şəraitindən düzgün istifadə edilərsə, bu, irəliləyiş üçün fürsət ola bilər. İrana səfər etməkdə məqsədim İranın nailiyyətləri ilə tanış olmaqdır.”

Çıxışının sonunda Lukaşenko həmçinin bildirib ki, indiki çətin beynəlxalq vəziyyət bizim üçün real və qeyri-real dostları müəyyən etməkdə yardımçı olub və biz xüsusilə real yoldaşlarla əməkdaşlıq etmək əzminindəyik.