ABŞ Rusiya hücumunda Patriot sisteminin hədəf alındığını təsdiqləyib
Amerika rəsmisi deyir ki, Vaşinqton Rusiyanın Ukraynaya hücumu nəticəsində ölkənin Patriot sisteminə dəymiş ziyanın həcmini müəyyən etmək üçün lazımi qiymətləndirmələr aparır.
ABŞ Müdafiə Nazirliyinin Rusiyanın Ukraynaya raket hücumunda “Patriot” müdafiə sisteminin məhv edilməsi ilə bağlı hesabatından bir neçə saat sonra amerikalı bir rəsmi Vaşinqtonun bu sistemə dəyən zərərin həcmini müəyyən etmək üçün qiymətləndirmələr apardığını bildirib.
Rusiya Müdafiə Nazirliyi çərşənbə axşamı günortadan sonra (16 may) Ukraynada Amerika istehsalı olan Patriot sistemini hipersəs raketi ilə hədəfə aldığını açıqlayıb.
İndi CNN xəbər şəbəkəsinin saytı Amerika rəsmisinə istinadən iddia edib ki, bu sistem çərşənbə axşamı səhər saatlarında Rusiyanın hücumu zamanı zədələnib, lakin tamamilə məhv olmayıb.
Amerika rəsmisi bildirib ki, Vaşinqton dəymiş ziyanın həcmini müəyyən etmək üçün qiymətləndirmələr aparır. Onun sözlərinə görə, bu qiymətləndirmənin nəticəsi sözügedən sistemin Ukraynada olduğu yerdə təmir oluna biləcəyini və ya bütövlükdə yığılmalı olduğunu müəyyən edəcək.
ABŞ Milli Təhlükəsizlik Şurasının sözçüsü CNN-in bu məsələ ilə bağlı sualına cavab olaraq onu Ukrayna hökumətinə yönləndirib.
Çərşənbə axşamı günortadan sonra Ukrayna hakimiyyəti Rusiyadan atılan 6 hipersəs raketini ələ keçirib məhv etdiyini iddia edib. Bununla belə, Ukrayna hərbçiləri Rusiyanın “Patriot” sisteminin hədəf alındığı iddiasını şərh etməkdən imtina ediblər.
Ukrayna Hərbi Hava Qüvvələrinin sözçülərindən biri Yuri İhnat deyib: “Biz bu məsələ ilə bağlı şərh verə bilmərik. Rusiya mənbələrindən gələn xəbərləri şərh etmirik.”
Hazırda Ukraynada iki Patriot müdafiə sistemi yerləşdirilib. Bu sistemlərdən biri ABŞ, digəri isə Almaniya və Hollandiya tərəfindən hədiyyə edilib.
Hələlik Rusiyanın hücumunda bu sistemlərdən hansının hədəfə alındığı bəlli deyil, lakin onlardan hər hansı birinin uğursuzluğu Ukraynanın Rusiyanın raket hücumlarını dəf etmək qabiliyyətinə böyük mənfi təsir göstərəcək.
Amerika rəsmiləri CNN-ə bildiriblər ki, Rusiya artıq Patriot sistemini hipersəs raketləri ilə hədəfə alıb. Onlar bu hücumlardan birinin mayın 4-də baş verdiyini və bunun da uğurlu alınmadığını iddia ediblər.
Uzun lobbiçilikdən sonra Ukrayna hökuməti ABŞ-dan “Patriot” raketdən müdafiə sistemini almağa müvəffəq olub. Amerika qüvvələri 10 həftə ərzində ukraynalılara bu sistemlə işləmək və onu saxlamaq üçün təlim keçib. Bu sistemlər ötən ay Ukraynaya daxil olub.
Başqa bir amerikalı məmur bildirib ki, Rusiya raketləri “Patriot” sisteminin hissələrindən birini vurmuş ola bilər. “Patriot” raketdən müdafiə sistemi 6 hissədən ibarətdir: Generatorlar, radar dəsti, idarəetmə stansiyası, antenalar, işə salma stansiyası və təyinatlı raketlər.
CNN saytı yazıb ki, bu sistemin bir və ya bir neçə hissəsinə böyük ziyan vurulması Ukraynanı onu bağlamağa və təmir üçün Ukraynadan çıxarmağa məcbur edə bilər.
Patriot sistemi uzun məsafədən hədəfləri müəyyən etmək üçün güclü radar sisteminə malikdir. Bu xüsusiyyət Patriotu ballistik raketlərin qarşısını almaq üçün müdafiə vasitəsinə çevirir. Amma təhdidləri müəyyən etmək üçün zəruri olan bu sistemdən yayılan radar dalğaları qarşı tərəfə onu müəyyən edib yerini aşkarlamağa imkan verir.
Amerika rəsmiləri hesab edirlər ki, Rusiya hərbçiləri hipersəs raketlərindən istifadə etməklə bu siqnalları ələ keçirə və Patriotu hədəfə ala biliblər.
