Putin: İranın nəqliyyat marşrutunu dəstəkləyirik; Liderlərin dəstəyi ilə əlaqələri inkişaf etdirmək vədi
BRİKS-ə üzv ölkələrin yüksək rütbəli təhlükəsizlik rəsmilərinin iclasında İran İslam Respublikasının təmsilçisi kimi Sankt-Peterburqa səfər edən Ali Məqamlı Rəhbərin nümayəndəsi və Ali Milli Təhlükəsizlik Şurasının katibi Əli Əkbər Əhmədiyan cümə axşamı Rusiya Prezidenti Vladimir Putinlə səmimi mühitdə görüşüb.
Putinin Sankt-Peterburqdakı yay iqamətgahında Milli Təhlükəsizlik Şurasının katibi Sergey Şoyqunun iştirakı ilə keçirilən bu görüşdə tərəflər ikitərəfli münasibətlərlə bağlı bütün məsələləri müzakirə ediblər.
Ali Məqamlı Rəhbərin Ali Milli Təhlükəsizlik Şurasındakı nümayəndəsi Tehran-Moskva münasibətlərinin ikitərəfli miqyasda son inkişaf prosesini, eləcə də iki ölkənin beynəlxalq forumlardakı əməkdaşlığını diqqətə çatdırıb.
Rusiya Prezidenti də bu görüşdə bu ölkə ilə İran İslam Respublikası arasında ikitərəfli əlaqələri strateji xarakterli kimi qiymətləndirib.
Putin deyib: “Qeyd etməliyəm ki, son illər Rusiya ilə İran arasında dostluq münasibətləri daha dinamik xarakter alıb.”
Rusiya Prezidenti əlavə edib: “Münasibətlərdəki bütün bu inkişaflar əsasən İslam Respublikasının Rəhbəri Ayətullah Seyid Əli Xameneinin dəstəyi ilə baş verir. Sizdən xahiş edirəm ki, ona mənim ən xoş və ən səmimi arzularımı çatdırasınız.”
BRİKS qrupu liderlərinin qarşıdan gələn görüşünə toxunan Rusiya Prezidenti deyib: “Rusiya Kazanda keçiriləcək BRİKS toplantısında İranın yeni Prezidentini gözləyəcək.”
Rusiya Prezidenti iki ölkə arasında hərtərəfli uzunmüddətli əməkdaşlıq sazişinin hazırlanması prosesinə toxunaraq deyib: “Rusiya yeni strateji tərəfdaşlıq sazişini imzalamaq üçün İran Prezidentinin ayrıca səfərini gözləyir.”
Rusiyanın İranla müxtəlif sahələrdə əməkdaşlıq etmək əzmində olduğunu bildirən Putin xatırladıb: “Bu ilin ilk 6 ayında iki ölkə arasında ticarət dövriyyəsinin həcmi təxminən 10 faiz artıb.”
O, həmçinin İranın yeni Prezidenti üçün Rusiya ilə əməkdaşlığın prioritet olmasından məmnunluğunu ifadə edib, Şimal-Cənub Dəhlizinin inkişafını iki ölkənin prioritet layihələrindən biri adlandırıb.
Rusiya Prezidenti vurğulayıb: “Biz İranın nəqliyyat marşrutunu dəstəkləyirik.”
