Çin Ay təqviminə görə Yeni ili qarşılayır: Rəngarəng məbəd yarmarkaları və qədim ənənələr

Yanvarın 28-dən 29-na keçən gecə Çində Şərq təqviminə görə Yeni il – çinlilərin özlərinin “Chunjie” (Bahar bayramı) adlandırdığı festival başlayıb.

Oxu.Az-ın TASS-a istinadla verdiyi məlumata görə, Pekində onminlərlə insan səhərdən qohum və yaxınları ilə birlikdə Çinin əsas bayramının ab-havasına qoşulmaq üçün məbəd ərazilərinə toplaşmağa başlayıb.

Məbəd yarmarkaları – miaohui – iki min ildən artıq tarixə malikdir. Onlar ölkədə təkcə Yeni ildə deyil, məhz Bahar bayramında xüsusi təntənə ilə keçirilir. Festivalda xalq mahnıları, şir və əjdaha rəqsləri, ənənəvi opera, yumoristik səhnəciklər və akrobatik nömrələr nümayiş olunur.

Tacirlər yarmarka meydanlarında sıra ilə düzülərək qonaqlara küçə yeməklərinin geniş çeşidini – tanghulu (çubuqda şəkərlənmiş meyvələr), düşbərə, kabablar, tofu, niangao (yapışqanlı düyüdən desert), əriştə və bir çox başqa təamlar təklif edirlər.

Yeməkdən əlavə, festivallarda bayram atributları olan müxtəlif suvenirlər – kağız balıqlar, qırmızı fənərlər, ənənəvi geyim və baş geyimləri, kalliqrafiya və tikmələr satılır. Uşaqlar üçün yarmarkada böyüklərin də həvəslə iştirak etdiyi oyunlar və müsabiqələr təşkil olunur.

Həmçinin çinlilər əcdadlara ehtiram mərasimi keçirir, yeni ildə xoşbəxtlik və uğur diləmək üçün daoist, konfutsi və buddist məbədlərini ziyarət edirlər.

Pekində məbəd yarmarkaları 4 fevraladək davam edəcək Yeni il tətili ərzində açıq olacaq.

Qeyd edək ki, yanvarın 28-dən 29-na keçən gecə Çində “Yaşıl ağac İlan ili” başlayıb. Çin astrologiyasında 12 bürc işarəsi bir-birini dövrü olaraq əvəz edir. Beləliklə, növbəti il “Qırmızı od Atı” işarəsi altında keçəcək. Hər dəfə bu və ya digər işarə dünyanın yarandığı beş elementdən biri ilə – metal, ağac, su, od və torpaqla birləşir. Hər elementin öz rəngi var: ağ, yaşıl, qara (və ya göy), qırmızı və sarı. Beləliklə, 60 illik dövr yaranır ki, bunun içində, məsələn, İlan ağ və metal, yaşıl və ağac, qara (və ya göy) və su, qırmızı və od, sarı və torpaq olur. “Yaşıl ağac İlan ili” son dəfə 1965-ci ildə qeyd olunub.

İlan – və ya Səma İmperiyasında onu adlandırdıqları kimi kiçik əjdaha – çinlilərdə müdriklik, yaradıcılıq, uyğunlaşma və rifah ilə assosiasiya olunur. Çin mədəniyyətində ilan Qərbdə olduğu kimi kəskin mənfi çalarlar daşımır. Bu işarə “in qüvvəsi” – qadın qaranlıq passiv metafizik başlanğıc ilə bağlıdır. Çin mifologiyasında bəşəriyyətin yaradıcısı olan ilahə Nyuyva insan başlı və ilan bədənli varlıq kimi təsvir olunur.