Ağ ev ABŞ və HƏMAS arasında danışıqların keçirildiyini təsdiqləyib

Ağ evin mətbuat katibi Kerolayn Livitt Vaşinqtonun HƏMAS hərəkatı ilə danışıqlar apardığını təsdiqləyib.

“Report” xarici KİV-ə istinadən xəbər verir ki, bu barədə Livitt brifinqdə bəyan edib.

“Danışıqlar və müzakirələr aparılır. Mən bu əlaqələrin təfərrüatlarını açıqlamayacağam”, – o vurğulayıb.

Onun sözlərinə görə, Prezident Donald Tramp “Amerika xalqının ən yaxşı maraqları naminə bütün dünyada insanlarla dialoqu” dəstəkləyir.

“Bu, İsraillə razılaşdırılıb”, – o qeyd edib.

Xatırladaq ki, daha əvvəl “Axios” portalı mənbələrə istinadən Tramp administrasiyasının HƏMAS ilə Amerika girovlarının azad edilməsi və Qəzza zolağında daha geniş atəşkəs razılaşmasının bağlanması imkanları ilə bağlı qeyri-rəsmi birbaşa danışıqlar apardığını xəbər vermişdi. Trampın girovlar üzrə xüsusi elçisi Adam Beler ilə HƏMAS nümayəndələri arasında görüşlər Dohada keçirilmişdi.