Gərgin telefon danışığı: Tramp və Netanyahu arasında İranla bağlı fikir ayrılığı var

Tramp diplomatiya yolu ilə daimi razılaşma əldə etməyi hədəfləsə də, Netanyahu hərbi müdaxilənin qaçılmaz olduğunu müdafiə edir. İsrail mediası görüşün “gərgin” keçdiyini və tərəflər arasında əsaslı fikir ayrılıqlarının olduğunu bildirir. ABŞ prosesin birlik içində davam etməsini istəsə də, İsrail hazırkı anı “fürsət” olaraq görür.

İsrailin Kanal 12 televiziyası bazar ertəsi bildirib ki, İsrailin baş naziri Benyamin Netanyahu ilə ABŞ prezidenti Donald Tramp arasında son “gərgin” telefon danışığında əsaslı fikir ayrılıqları yaranıb.

İsrail kanalı bildirib ki, “İran məsələsi ilə bağlı iki tərəf arasında əsaslı fikir ayrılıqları yaranıb”.

Zəng zamanı Tramp Netanyahuya deyib ki, o, “İsrailin təhlükəsizlik ehtiyaclarını təmin edəcək və eyni zamanda Vaşinqtonun məqsədlərinə çatmasına imkan verəcək yaxşı razılaşma əldə etmək üçün İranla diplomatik həll yoluna getmək istəyir”.

Bunun əksinə olaraq, Netanyahunun Tehrana qarşı daha sərt ritorikadan istifadə etməyə davam etdiyi bildirilir .

Bu gün Netanyahu ilə görüşəndən sonra ABŞ-ın Daxili Təhlükəsizlik Naziri Kristi Noem deyib ki, prezident Tramp onu “xüsusi olaraq Netanyahu ilə İran-ABŞ danışıqlarının necə irəlilədiyi barədə danışmaq üçün göndərib” və “birlikdə qalmağın və bu prosesdə prosesin irəliləməsinə imkan verməyin nə qədər vacib olduğunu” vurğulayıb.

NBC News daha əvvəl ABŞ rəsmilərinə və diplomatlarına istinadən xəbər vermişdi ki, Tramp və Netanyahu arasında münasibətlər, xüsusən də İran və Qəzza ilə bağlı “ gedərək gərginləşib ” .

Hesabatda ən böyük fikir ayrılıqlarının “İranın nüvə məsələsi” üzərində cəmləşdiyi bildirilib.

Tramp “İranın nüvə silahı əldə etməsinin qarşısını almağın yolunun razılaşmadan keçdiyinə” inansa da, “İsrail bu prosesin davam etdiyi bir vaxtda İranın nüvə obyektlərinə hücum üçün ideal fürsətin əldən verilə biləcəyindən narahatdır”, – deyə Amerika kanalı yazıb.