İsrail həbs düşərgələrində fələstinli qadınlara qarşı işgəncələr şiddətlənir

İsrailin Deymon konsentrasiya düşərgəsində saxlanılan fələstinli qadın girovlar işgəncə, cinsi təhdidlər və fundamental hüquqların pozulması ilə üzləşirlər. Hamilə və xəstə qadınlar eyni palatada saxlanılır, girov götürülən uşaqlar kameralarla izlənilir, beynəlxalq hüquqa məhəl qoyulmur.

 İşğal altındakı Fələstin ərazisində İsrailin Deymon həbs düşərgəsində saxlanılan fələstinli qadın girovların son vaxtlar misli görünməmiş dərəcədə sərtləşdirilmiş işgəncələrə məruz qaldığı bildirilir.

Fələstin Girovları İnformasiya İdarəsinin verdiyi məlumata görə, həbs düşərgəsinin rəhbərliyi sistematik repressiv siyasətlərini gücləndirərək, girovların gündəlik həyat şəraitini daha da ağırlaşdırır.

Yeni qaydalara əsasən, qadın girovların tualetə gündəlik “fasilə” vaxtı cəmi on beş dəqiqə ilə məhdudlaşdırılıb.

Təhlükəsizlik məqsədilə şöbənin qapıları uzun saatlarla bağlı saxlanılır və yemək porsiyaları ciddi şəkildə azaldılır.

İsrailin İrana hücumunun əvvəlində beş fələstinli qadın girov-İslam Şuli, Tasnim Ode, Lin Misk, Sama Hicavi və Fatima Jasravi zorakı rəftara məruz qalıb.

Bu müddət ərzində karserə salınan qadınların üzərinə tüpürüldüyü, zorlanmaqla hədələndiyi, şifahi alçaldıldığı bildirilib.

Bildirilir ki, hamilə qadınlar və xərçəng xəstələri eyni palatada saxlanılır, azyaşlı girovlar isə kameralar tərəfindən izlənilən otaqlarda qalmağa məcbur edilir.

Həbs düşərgəsi rəhbərliyinin gözyaşardıcı qaz və polis itlərindən istifadəni davam etdirdiyi, “eşnaf” kimi tanınan ümumi ərazinin indi yalnız yemək paylanması üçün açıldığı bildirilib.

Qadın mühafizəçilər yeməyin paylanmasına yaxından nəzarət edərkən, girovlar otaqlar arasında daşınarkən, onları həyətdə diz çökməyə vadar edən çaxnaşma qumbaraları atırlar.

Üç ayrı otaqda aparılan son axtarışda girovların şampun, sabun və kağız salfetləri kimi əsas ehtiyacları da müsadirə edilib.

Fələstinli Məhbusların İnformasiya İdarəsi bütün bu tətbiqlərin beynəlxalq razılaşmaların açıq şəkildə pozulması olduğuna diqqət çəkərək, “Bu üsullar işğalçı dövlətlərin fələstinli girov qadınları hədəf alan zülm siyasətinin təhlükəli bir şəkildə artdığını göstərir” dedi.

Ofis pozuntulara dərhal son qoymaq, girov qadınları qorumaq və işğalçı qüvvələri beynəlxalq ictimaiyyət qarşısında məsuliyyətə cəlb etmək üçün təcili tədbirlər görməyə çağırıb.