İraqdakı nümayişlərdə qarşıdurma; Ölənlər və yaralananlar var – Foto

Eastnews.org-un verdiyi xəbərə görə, İraqın cənubundakı Zikar vilayətində (Nasiriyə) “Sədr” hərəkatı tərəfdarları ilə nümayişçilər arasında qarşıdurma baş verib.

Təhlükəsizlik mənbələrindən əldə edilən məlumata görə, “Sədr” tərəfdarları ilə nümayişçilər arasında silah və dəyənəklərlə olan qarşıdurmada 3 nümayişçi həlak olub və təhlükəsizlik qüvvələri də daxil olmaqla 70 nəfər yaralanıb.

Şəhərdəki gərginliyin davam etdiyi ifadə edilib.

Qeyd edək ki, “Sədr” tərəfdarı qrup şəhərdəki nümayiş bölgəsinə basqın edərək, nümayişçilərə hücum etmiş və çadırları yandırmışdı. Hadisə ilə əlaqədar olaraq Şəhər Polis İdarəsinin rəisi vəzifəsindən azad edilərək, komendant saatı elan edilmişdi.

Müqtəda əs-Sədrin çağırışı ilə yüzlərlə tərəfdarı Bağdadda olduğu kimi Zikarın mərkəzində də Cümə namazı qılmış və sonra liderlərinin seçkilərə qatılması çağırışına dəstək nümayişi təşkil etmişdi.