Kabildə ardıcıl 4 partlayışda 2 əsgər həlak oldu

Əfqanıstan paytaxtı şənbə günü (26 dekabr) şəhərin müxtəlif yerlərində ardıcıl dörd partlayışa şahid olub.

Deyerler.org Farsnews-a istinadən xəbər verir ki, Kabil polisi, şəhərdəki bir sıra partlayışlar nəticəsində iki əsgərin öldüyünü və altı əsgərin yaralandığını bildirib.

İlk partlayış səhər saat 07:02 radələrində Kabilin 8-ci təhlükəsizlik bölgəsinin ot sahəsində baş verib. Polisin verdiyi məlumata görə, maqnit minasının yaratdığı hadisə nəticəsində xəsarət alan olmayıb.

Kabil Polis Komandanlığının sözçüsü Firdovs Fəramərz ikinci partlayışın səhər 07:05-də 6-cı bölgədə baş verdiyini və iki polisin yaralandığını bildirib.

Sözçünün verdiyi məlumata görə, Faiz Məhəmməd Katib yolunda “Ranger” avtomobili minaya düşüb. Yaralılar müalicə üçün xəstəxanaya aparılıb.

Üçüncü partlayış isə, səhər 09:05 radələrində Kabilin üçüncü bölgəsindəki Şəhid yol ayrıcında baş verib.

Kabil polisinin sözçüsü, Ranger avtomobilinin minaya düşdüyünü, iki polisin öldüyünü və bir mülki şəxsin yaralandığını bildirib.

Dördüncü partlayış səhər saat 09:00 radələrində hərbi maşının hədəfə alındığı Şahid Dehburi kəsişməsinin yaxınlığında baş verib.

Heç bir şəxs və ya qrup bu hadisələrə görə, məsuliyyəti öz üzərinə götürməyib.

Son vaxtlar Əfqanıstanın müxtəlif bölgələrində, xüsusən paytaxt Kabildə maqnit və yol kənarındakı partlayışlar həyəcan yaradacaq formada artıb. Partlayışların əksəriyyətinə görə, məsuliyyəti heç bir qruplaşma öz üzərinə götürməyib.