Daşkəsəndə Vətən müharibəsi şəhidinin anım mərasimi keçirilib
Daşkəsəndə şəhid Abbasov Möhlət Eldəniz oğlunun anım mərasimi keçirilib.
Rayonun Şəhidlər Xiyabanında keçirilən anım mərasimində M.Abbasovun yaxınları ilə yanaşı, ictimaiyyət nümayəndələri, qazilər, hüquq-mühafizə orqanlarının əməkdaşları iştirak edib.
Şəhidin məzarı üzərinə gül dəstələri düzülüb, ruhuna dualar oxunub.
Mərasimdə çıxış edən şəxslər şəhidin döyüş yolundan bəhs edib, Vətən Müharibəsi dövründə Azərbaycan Ordusunun göstərdiyi şücaətdən danışıblar.
Qeyd edək ki, Daşkəsən rayon Yuxarı Daşkəsən qəsəbə sakini M.Abbasov 2001-ci ildə andan olub. O, Füzuli, Qubadlı, Zəngilan, Xocavənd və Şuşanın azadlığı uğrunda gedən döyüşlərdə iştirak edib, şəxsi igidlik və şücaət nümunələri göstərib.
M.Abbasov 7 noyabr 2020-ci ildə Şuşanın Daşaltı istiqamətində gedən döyüşlər zamanı qəhrəmançasına şəhid olub. O, 9 noyabr 2020-ci il tarixdə Daşkəsən rayonunun Şəhidlər Xiyabanında dəfn olunub.
Prezident İlham Əliyevin sərəncamları ilə şəhid əsgər Möhlət Abbasov vəzifə borcunu şərəflə yerinə yetirdiyinə görə “Vətən uğrunda”, “Cəsur döyüşçü”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub.
Report
