İran Pakistanın Pişavər şəhərində məscidə hücumu pisləyib

İran Xarici İşlər Nazirliyinin sözçüsü Pakistanın Pişavər şəhərində məscidə hücumu “terror aktı” adlandırıb və bunu pisləyib.

İran Xarici İşlər Nazirliyinin sözçüsü Səid Xətibzadə cümə günü Pakistanın Pişavər şəhərinin Rəsaldar küçəsindəki məscidinə hücumu “terror aktı” adlandırıb və bunu qəti şəkildə pisləyib.

İran Xarici İşlər Nazirliyinin ictimaiyyətlə əlaqələr idarəsinin məlumatına görə, Xətibzadə hücumu müsəlmanlar arasında təfriqə yaratmaq hesab edib və sağ qalanlara başsağlığı verib və yaralıların tezliklə sağalmasını arzulayıb.

O, həmçinin Pakistan hökuməti və təhlükəsizlik rəsmilərinin terrorçuların terror fəaliyyətinin qarşısını almaq üçün lazımi tədbirlər görəcəklərinə və qəti addımlar atacaqlarına ümid etdiyini bildirib.

Pakistanın şimal-qərbində, Pişavər şəhərində şiə məscidində törədilən partlayış nəticəsində azı 30 nəfər ölüb, çoxlu sayda insan yaralanıb.

Pakistan polisi bildirib ki, partlayış namazqılanlar cümə namazına toplaşarkən baş verib.

Ölənlərin sayının artması ilə bağlı narahatlıq olsa da, heç bir şəxs və ya qrup hücuma görə məsuliyyəti üzərinə götürməyib.