Lavrovla danışdım, yaxın günlərdə yaxşı xəbərlər gözləyirik – Çavuşoğlu ELAN ETDİ

“Ukraynada olan Türkiyə vətəndaşlarının təxliyəsi davam edir. Ukraynadakı Ahıska türklərini, Krım tatarlarını və digər xalqların nümayəndələrini də təxliyə edirlər”.

Publika.az xəbər verir ki, bunu Türkiyə Xarici İşlər naziri Mövlud Çavuşoğlu deyib.

“Dünən gecə yarısı Sergey Lavrov mənə zəng etdi. Vəziyyət get-gedə yaxşılaşır. Bu gün və ya sabah şad xəbər gözləyirik. Atəşkəsin davamlı olması üçün səylər göstərilir. Öyrəndik ki, vətəndaşlarımızın məsciddə yemək-içmək qıtlığı yoxdur.

Mülki şəxslərin də çıxarılması üçün səylər göstərilir. Biz bu tədbirlərimizi davam etdirəcəyik. Biz Ukraynanın ərazi bütövlüyünü dəstəkləyirik. Dostlarımız bu gün yenidən vətəndaşlarımızın təxliyəsi üçün çalışırlar. Lvovdan 2 avtobusun yola düşməsini gözləyirik. Daha 1 avtobus Odessadan yola düşəcək. Vətəndaşlarımızın Mariupoldan təxliyəsi üçün şərait yaradılır. Azərbaycanlı qardaşlarımızın təxliyəsi ilə bağlı da əvvəldən məlumat vermişdik” – Çavuşoğlu qeyd edib.

Nazir əlavə edib ki, 14 800-dən çox Türkiyə vətəndaşı Ukraynadan təxliyə edilib. Hazırda 350-yə yaxın türk oradadır.

Publika.az