ABŞ-də yanğınların miqyası genişlənir, Hollivud aktyorlarının evləri kül olub

Kaliforniyadakı yanğınlar zamanı aktyorlar Con Qudmen (“Böyük Lebovski”), Billi Kristal (“Harri Salli ilə tanış olanda”) və komediya ustası Yucin Levinin malikanələrini tamamilə məhv edib.

“Report” TASS-a istinadən xəbər verir ki, bu barədə TMZ portalı məlumat yayıb.

Məlumata görə, onlarla məşhur şəxs Los-Ancelesin təbii fəlakətdən zərər çəkmiş ərazilərindən təxliyə olunub.

Kaliforniya Yanğınsöndürmə Xidmətinin məlumatına görə, Los-Anceles dairəsində yanğınların ümumi sahəsi təxminən 11 min hektara çatıb. Alov mindən çox tikilini məhv edib və ən azı 5 nəfərin ölümünə səbəb olub, 175 mindən çox istehlakçı işıqsız qalıb.

Yerli hakimiyyət qonşu dairələrdəki yanğınsöndürənlərdən kömək istəyib, həmçinin Vaşinqton, Oreqon və Nevada ştatlarından təcili xidmətlərin işçiləri göndərilib. Lakin alovu söndürmək hələ mümkün olmayıb. Yanğınların baş verdiyi ərazidə güclü küləklə müşayiət olunan aşağı rütubət qalmaqdadır.

CNN telekanalı qeyd edir ki, bunun nəticəsində yanğınların sayı altıya çatıb. “AccuWeather” şirkətinin proqnozlarına görə, yanğından dəyən ziyan və iqtisadi itkilər 52-57 milyard dollar təşkil edəcək.