ABŞ-İsrail yardım çantalarında narkotik tapılıb

Qəzza rəsmiləri ABŞ və İsraildən göndərilən narkotik həbləri olan yardım kisələrinin Fələstin xalqına qarşı qəsdən hücum olduğunu və cəmiyyəti daxildən məhv etmək məqsədi daşıdığını açıqlayıb.

Qəzza rəsmiləri İsrailin işğalçı qüvvələrini xarici yardım daşımaları vasitəsilə mühasirədə olan Qəzza zolağına narkotik həbləri keçirməkdə ittiham edərək, bu hərəkəti Fələstin xalqına qarşı “vəhşi cinayət” kimi qiymətləndirib.

Qəzzadakı Hökumət Media Ofisindən verilən rəsmi açıqlamada, ABŞ və İsrailin idarə etdiyi yardım paylama mərkəzlərində paylanan un kisələrində narkotik həblərin olduğu bildirilib.

Ofis bunu Fələstin xalqına birbaşa hücum kimi qiymətləndirib və bunun “sosial quruluşu sarsıtmaq və mülki şəxslər arasında asılılıq yaymaq” cəhdi olduğunu bildirib.

“İsrail mütəşəkkil cinayət şəbəkəsini idarə edir”

“Bu həblər Qəzzaya daxil olan yardım çantalarının diqqətlə yoxlanılması zamanı aşkar edilib”, – bəyanatda deyilir.

Təchizatların davam edən müharibə və ictimai sağlamlıq böhranı fonunda humanitar yardım adı altında qaçaqmalçılıq yolu ilə gətirildiyi vurğulanıb.

Bəyanatın davamında deyilir: “Bu, cəmiyyəti daxildən sarsıtmaq üçün məqsədyönlü cəhddir”.

Hökumətin Media İdarəsi “zəhərli və narkotik maddələrin” yeridilməsinə görə tamamilə İsrail işğalını məsuliyyətli hesab edib və beynəlxalq təşkilatları mühasirədə olan mülki əhaliyə qarşı planlaşdırılmış cinayətin törədildiyini bildirərək dərhal araşdırma aparmağa çağırıb.

Qəzza rəsmiləri həmçinin əhaliyə xəbərdarlıq edərək, onları şübhəli yardım mərkəzlərindən alınan bütün qida məhsullarını diqqətlə yoxlamağa və qablaşdırmada aşkar edilən yad və ya şübhəli maddələri səlahiyyətlilərə bildirməyə çağırıb.