ABŞ və İngiltərə koalisiyası yenə Əl Hudeydəyə hücum etdi

Yəmən mediası ABŞ və Böyük Britaniyanın Yəmənin Hudeydə əyalətindəki bir bölgəyə yeni hücumu barədə məlumat yayıb.

İRNA-nın məlumatına əsasən, Amerika və Britaniya döyüş təyyarələri bu gün (21 avqust) Yəmənin qərbində yerləşən Hudeydə əyalətinin “Əs-Səlif” bölgəsini üç dəfə bombalayıb.

Hücumla bağlı əlavə məlumat verilməyib.

Yəmənin müxtəlif bölgələri, xüsusilə Hudeydə əyaləti son aylarda ABŞ və İngiltərənin təcavüzkar hücumlarının hədəfinə çevrilib. Bu hücumlar Yəmən Milli Qurtuluş hökumətinə sionist rejimə qarşı tətbiq edilən dəniz blokadasını dayandırması üçün təzyiq göstərmək məqsədilə həyata keçir.

Qeyd edək ki, bu gün (21 avqust) Britaniya təşkilatı da Yəmənin Hudeydə limanı yaxınlığında yeni dəniz qəzasının baş verdiyini bildirib.

İngiltərə Ticarət Dəniz Əməliyyatları Agentliyi Yəmənin Hudeydə şəhərinin 77 mil qərbində insident baş verdiyinə dair xəbərlər aldığını açıqlayıb.

Bu cür xəbərlər ümumiyyətlə Yəmən Silahlı Qüvvələrinin Qırmızı dənizdə düşmən gəmilərinə qarşı həyata keçirdiyi əməliyyatlara aiddir.

Bu hadisənin təfərrüatları hələlik açıqlanmasa da, Yəmən Fələstin xalqına dəstək məqsədilə İsrail gəmiləri və ya təyinat yeri işğal olunmuş ərazilərin limanları olan gəmilərin Ərəbistan və Qırmızı dənizdən keçməsinə icazə verməyəcəyini dəfələrlə bəyan edib. Yəmən ordusu bu çərçivədə uğurlu əməliyyatlar həyata keçirərək, işğal olunmuş ərazilərin cənubundakı limanlara ciddi iqtisadi ziyan vurub. Lakin buna cavab olaraq, ABŞ və Böyük Britaniyanın rəhbərlik etdiyi koalisiya sionist rejimin Qəzzada Fələstin xalqına qarşı törətdiyi cinayətlərə açıq dəstək olaraq, gəmiçiliyi qorumaq bəhanəsi ilə dəfələrlə Yəmən ərazisinə hücum edib.