Ağ Ev İraqdakı ABŞ qüvvələrinə edilən hücumlara “son dərəcə ciddi” yanaşır

Ağ Ev bazar günü bildirib ki, Birləşmiş Ştatlar həftə sonu militantların İraqda ABŞ qüvvələrinin yerləşdiyi bazaya hücumuna “son dərəcə ciddi” yanaşır.

Ağ Evin milli təhlükəsizlik müşavirinin müavini Con Fayner bazar günü ABC telekanalının “Bu həftə” verilişində çıxışı zamanı “Bu, ballistik raketlərin imkanlarından istifadə etməklə həqiqi təhlükə yaradan çox ciddi bir hücum idi” deyib.

“Belə hallardan çəkindirmək və bizə hücum etməyə davam edən bu qrupları məsuliyyətə cəlb etmək üçün biz buna cavab verəcəyik” Fayner əlavə edib.

ABŞ ordusunun bildirdiyinə görə, şənbə günü axşam saatlarında İraqda silahlılar tərəfindən İraqın qərbindəki Əl-Əsəd Hərbi Hava Bazasına “çox sayda ballistik və digər raketlər” atılıb.

Pentaqon bazaya atılan mərmilərin əksəriyyətinin hava hücumundan müdafiə sistemləri tərəfindən tutulduğunu bildirib.

Balistik raketlərin istifadəsi əvvəllər daha aşağı texnologiyalı raketlər və dronlarla həyata keçirilən hücumların artdığını göstərir.

Oktyabrın ortalarından bəri İraq İslam Şam Dövləti (İŞİD) qrupunun cihadçıları ilə mübarizə aparmaq üçün İraqdakı təxminən 2500 ABŞ əsgəri və Suriyadakı digər koalisiya qüvvələri ilə birlikdə orada yerləşdirilən 900 hərbçiyə onlarla hücum həyata keçirilib.

Şənbə günü baş verən hücum da daxil olmaqla, hücumların əksəriyyətini ABŞ-ın Qəzza münaqişəsində İsrailə dəstəyinə qarşı çıxan silahlı qrupların ittifaqı “İraqda İslam Müqaviməti” öz üzərinə götürüb.

Suriya, Livan, İraq və Yəməndə artan raket hücumları Qəzza müharibəsinin Yaxın Şərqdə genişlənməsi qorxusunu artırıb.