Almaniya: Qəzzada baş verənlər artıq qəbuledilməzdir
Almaniya kansleri Fridrix Merz İsrailə dəstəyin davam edəcəyini vurğulayaraq Qəzzada baş verənlərin artıq qəbuledilməz olduğunu bildirib.
Almaniya kansleri Fridrix Merz, İsrailin Qəzzada davam edən hərbi əməliyyatlarını tənqid edərək, dərhal atəşkəs və fələstinlilərə hərtərəfli humanitar yardımın çatdırılmasına çağırıb.
Cümə günü Berlində mətbuat konfransında danışan Merz Qəzzada humanitar vəziyyətin həyəcanverici həddə çatdığını bildirib.
“Qəzza zolağında baş verənlər artıq bizim üçün məqbul deyil. Bizim prioritetimiz orada ən qısa zamanda atəşkəsin təmin edilməsi və yardımların maneəsiz çatdırılmasını təmin etməkdir”.
Kansler son günlər bu məsələ ilə bağlı müxtəlif diplomatik təmaslar etdiyini də qeyd edib.
“Mən dünən Londonda Böyük Britaniyanın baş naziri Keir Starmer ilə bu məsələni müzakirə etdim. Gələn həftə Fransa prezidenti Emmanuel Makronun Berlinə səfəri zamanı bu məsələni yenidən gündəmə gətirəcəyəm”.
Merz deyib ki, Almaniya da İsrailin baş naziri Benyamin Netanyahu ilə telefon danışığında öz narahatlığını açıq şəkildə ifadə edib.
“Biz İsraili dəstəkləməyə davam edəcəyik, lakin bu, gördüyümüz səhvlərə göz yumacağımız anlamına gəlmir. Qəzzada baş verənlər o həddə çatıb ki, qəbuledilməzdir”.
İsrailin humanitar yardıma qoyduğu məhdudiyyətləri və hərbi əməliyyatların aparılmasını tənqid edən Merz bəzi Avropa İttifaqı (Aİ) ölkələrinin təklif etdiyi sanksiyalardan uzaqlaşır.
Almaniyanın İsrail ilə Aİ arasında Assosiasiya sazişinin dayandırılmasına qarşı olduğunu vurğulayan Merz bu məsələnin Avropa Şurasında ətraflı müzakirə edildiyini bildirib.
“Biz heç nəyi alt-üst etmirik. Əksinə, diplomatik kanallardan maksimum istifadə etməyə üstünlük veririk”, – o deyib.
Bəzi AB üzvlərinin ikili standartlarla bağlı tənqidlərinə cavab verən Merz, Almaniyanın İsrailə münasibətinin Rusiya nümunəsi ilə müqayisə edilə bilməyəcəyini müdafiə etdi.
“Rusiyadan fərqli olaraq, İsrail hələ də demokratik ölkədir. Üstəlik, hücuma məruz qalmış dövlətdən danışırıq. O, özünü müdafiə etməli idi, əks halda İsrail Dövləti bu gün mövcud olmazdı”, – o deyib.
Middle East Monitor-a görə , Almaniya “uzun müddətdir ki, İsrailin ən güclü dəstəkçiləri arasındadır və bu, onun tarixi məsuliyyətinin ölçüsüdür”.
Bununla belə, Merz hökuməti son həftələrdə İsrailin Qəzzada keçirdiyi hərbi əməliyyatları, humanitar yardımın paylanmasını əngəllədiyini və bəzi İsrail nazirlərinin ərazi ilhaqı və fələstinlilərin qovulması ilə bağlı danışıqlarını əsas gətirərək daha tənqidi mövqe nümayiş etdirib.
