Britaniya Roman Abramoviçi məhkəməyə verməklə hədələyir: Chelsea satışından əldə olunan 2.5 milyard funtun taleyi!

Sizinyol xarici KİV-ə istinadən xəbər verir:

Britaniya hökuməti keçmiş Chelsea sahibi Roman Abramoviçi məhkəməyə verməyə hazır olduğunu açıqlayıb. Söhbət Abramoviçin 2.5 milyard funt sterlinq (təxminən 3.4 milyard dollar) dəyərində olan Chelsea satışından əldə etdiyi vəsaitdən gedir.

Britaniya hökuməti bu vəsaitin Ukrayna müharibəsinin qurbanlarına yönəldilməsini tələb edir. Lakin Abramoviç vəsaitin bütün müharibə qurbanlarına, o cümlədən Rusiyadakı zərərçəkənlərə də paylanmasını istəyir. Bu fikir ayrılığı səbəbindən vəsait Britaniya bankında dondurulmuş vəziyyətdə qalır.

Britaniya Maliyyə Naziri Rachel Reeves və Xarici İşlər Naziri David Lammy birgə açıqlamalarında bildirdilər ki, hökumət Abramoviçlə razılığa gələ bilmədiyi üçün məhkəmə yolu ilə bu vəsaiti Ukraynaya yönəltməyə hazırdır.

Chelsea klubu 2022-ci ilin may ayında ABŞ-lı investor Todd Boehly və Clearlake Capital tərəfindən satın alınıb. Satış şərtlərinə əsasən, Abramoviç bu vəsaitdən heç bir mənfəət əldə etməməlidir.

Britaniya hökuməti Abramoviçlə danışıqları davam etdirməyə açıq olduğunu bildirsə də, məhkəmə prosesinin başlanması ehtimalı getdikcə artır.