Dünyada buğda qıtlığı Yəməndə ərzaq böhranını daha da gücləndirir

Yəmən buğdasının əsas tədarükçüsü olan Rusiya, Ukrayna və Hindistandan buğda ixracının dayandırılması və qiymətlərin kəskin artması ilə ölkədə milyonlarla insan aclıq və qıtlıq böhranı ərəfəsindədir.

“Reuters” agentliyinin məlumatına görə, Yəmən yeni buğda tədarükçüləri axtarır, lakin davamlı olaraq artan idxal xərclərini ödəmək üçün köməyə ehtiyacı var.

Ümumdünya Ərzaq Proqramı (WFP) milyonlarla insanın üzləşdiyi qıtlıq ərəfəsində ərzaq yardımının kəsiləcəyi barədə xəbərdarlıq edib.

Ukrayna müharibəsi səbəbindən dünyada buğda tədarükünün pozulması və Hindistanın buğda ixracını qəfil dayandırması Yəməndə aclıq böhranını daha da gücləndirib və ərzaq qiymətlərində inflyasiyanı artırıb ki, bu da son iki ildə ölkənin bəzi bölgələrində iki dəfə artıb.

Ukrayna və Rusiya əsas taxıl ixracatçıları idilər və onlar arasındakı münaqişə dünya buğdasının qiymətlərini artırıb.

Yəmən ərzaq məhsullarının 90%-ni digər ölkələrdən idxal edir.

Ümumdünya Ərzaq Proqramının direktoru Riçard Raqan Reuters agentliyinə bildirib ki, ölkədə aclığa yaxın şəraitdə yaşayan insanların sayı indi təxminən beş milyondan 2022-ci ilin ikinci yarısında 7 milyona yüksələ bilər.

Hesabata görə, BMT Yəməndə hər ay 13 milyon insanı ərzaqla təmin edib ki, bu da yanvarda 8 milyon nəfərə endirilib. Bu il Yəmənin ehtiyacı olan 2 milyard dolların yalnız dörddə biri beynəlxalq donorlar sayəsində toplana bilib və bu rəqəmin  tezliklə daha da azala biləcəyi gözlənilir.