Əraqçi: Avropa ilə qarşılıqlı hörmət və ortaq maraqlar əsasında danışıqlara hazırıq

İran İslam Respublikası və Hollandiyanın xarici işlər nazirləri Seyid Abbas Əraqçi və Kasper Veldkamp telefon danışığında ikitərəfli münasibətlər, regional və beynəlxalq hadisələrlə bağlı fikir mübadiləsi aparıblar.

Xarici İşlər naziri İran İslam Respublikası hökumətinin digər ölkələrlə yaxşı diplomatik əlaqələr qurmaq üçün yanaşmasını vurğulayaraq deyib: “İran Avropa ölkələri ilə qarşılıqlı hörmət və ortaq maraqlar əsasında anlaşmaya və danışıqlara hazırdır.”

Hollandiyanın Xarici İşlər naziri də Hollandiya-İran əlaqələrinin uzun tarixinə və İranın regional inkişafdakı rolu və mövqeyinin əhəmiyyətinə toxunaraq, dövlətlərarası münasibətlərdə anlaşma yaratmaq və fikir ayrılıqlarını aradan qaldırmaq üçün bütün diplomatik imkanlardan istifadə etməyin vacibliyini vurğulayıb.

Kasper Veldkamp həmçinin Fars körfəzindəki üç İran adası ilə bağlı bildirib: “Bu, İran və BƏƏ arasında ikitərəfli məsələdir. Hollandiya, həmişə olduğu kimi, İran və BƏƏ arasında beynəlxalq hüquqa əsaslanan, bununla bağlı hər hansı mübahisənin həlli üçün ikitərəfli əməkdaşlığı dəstəkləyir.”