Fələstin müqaviməti: Sionistlərin cinayətləri müqavimət alovunu söndürə bilməz
Fələstinin HƏMAS və İslami Cihad hərəkatları bu gün (cümə) 17 yaşlı fələstinli gəncin şəhadəti ilə bağlı başsağlığı verərkən qeyd ediblər ki, sionistlərin cinayətləri müqavimət alovunu söndürə bilməz.
İRNA-nın Səma xəbər agentliyinə istinadən cümə günü verdiyi məlumata görə, HƏMAS hərəkatı bu barədə verdiyi bəyanatda vurğulayıb: İşğalçı rejimin işğal olunmuş Fələstin torpaqlarında artan cinayətləri nəinki inqilabımızı söndürə bilməyəcək, əksinə, onu daha da alovlandıracaq.
HƏMAS-ın bəyanatında vurğulanıb: Əgər işğalçı rejim bu cinayətlərin ona əmin-amanlıq və təhlkəsizlik gətirəcəyini düşünürsə, yanılır və bu işğalçı və qəsbkar rejim bilməlidir ki, millətimizin inqilabı onun tənəzzülünə və Fələstin xalqının məqsəd və ideallarının reallaşmasına qədər davam edəcək.
Fələstin İslami Cihad hərəkatı da öz bəyanatında 17 yaşlı fələstinli yeniyetmə Məhəmməd Əl-Bayizin sionistlərin işğal altındakı İordan çayının qərb sahilində Ramullahın şimalında yerləşən Ümmü Səfa kəndinə hücumu nəticəsində şəhid olması ilə bağlı ailəsinə və bütün Fələstin xalqına başsağlığı verib.
İslami Cihadın bəyanatında deyilir: İşğalçıların dinc əhaliyə və günahsız insanlara qarşı vəhşi cinayətləri millətimizin əzmini və müqavimət döyüşçülərimizin azadlıq və qurtuluş yolunu davam etdirmək şücaətini zəiflətməyəcək.
Bu bəyanat Fələstin xəbər mənbələrinin bu gün günortadan sonra (cümə günü) Ramullahın şimalında sionist qüvvələri tərəfindən bir fələstinli yeniyetmənin şəhadətini xəbər verməsindən sonra verilib.
Fələstin Əl-Yəvm şəbəkəsi sionist qüvvələrin bu gün işğal altındakı İordan çayının qərb sahilində Ramullahın şimalında yerləşən Ümmü Səfa kəndinə hücum etdiyini açıqlayıb.
Bu xəbərə görə, 17 yaşlı fələstinli yeniyetmə Məhəmməd Əl-Bayiz İsrail ordusu ilə kəndlilər arasında baş verən qarşıdurmadan sonra şəhid olub.
Xəbər mənbələri bu toqquşmalarda daha bir neçə fələstinlinin də yaralandığını bildirib.
Şahab xəbər agentliyi həmçinin elan edib ki, İsrail ordusu Ümmü Səfa kəndinə basqın etdikdən sonra sakinlərə atəş açıb və onlara gözyaşardıcı qaz atıb.
Xəbər mənbələri daha bir yaralının vəziyyətinin ağır olduğunu da açıqlayıb.
Son aylarda İordan çayının qərb sahilində sionist qüvvələrin hücumlarına qarşı Fələstin vətəndaşlarının müqaviməti və fələstinli döyüşçülərin sionistlərə qarşı silahlı mübarizəsi artıb.
