Generalların tez-tez bir araya gəlməsinin səbəbi nədir? – DETALLAR

“Müdafiə Nazirliyində xidmətdə və istefada olan generalların iştirakı ilə xidməti müşavirələr, toplantılar tez-tez olur. Hazırda buraxılış zamanıdır. Hərbi müdavimlər taktikadan, strategiyadan imtahan verirlər. Ona görə də generalların bir araya gəlməsi normal haldır. Digər tərəfdən, Azərbaycan Ordusunun strateji cəhətdən yenidən qurulması prosesi başlayıb. Ali Baş Komandanın tapşırığı ilə Azərbaycan Ordusu Türkiyə Ordusunun sisteminə keçir”.

Bunu Publika.az-a açıqlamasında politoloq Cümşüd Nuriyev son günlər Azərbaycan Müdafiə Nazirliyində vəzifədə və istefada olan generalların tez-tez toplanmasına, xidməti müşavirələr keçirməsinə münasibət bildirərkən deyib. 

Politoloq düşünür ki, hazırkı prosesdə keçmiş sovet sistemi hərbi ənənəsindən NATO sisteminə keçidlə bağlı müəyyən problemlər ola bilər: 

“Ona görə də bu cür görüşlərin keçirilməsi mümkündür. Eyni zamanda, hər hansı bir hərbi əməliyyatın keçirilməsi üçün Ali Baş Komandanın tapşırığı lazımdır. Mən inanmıram ki, belə bir tapşırığı həyata keçirmək üçün mediaya bu qədər açıq informasiya ötürülsün. Əgər media nümayəndələri generalların toplaşdığından xəbərdardırsa, deməli, Azərbaycan Ordusu hansısa gizli əməliyyata hazırlaşmır. Ola bilər ki, generalların toplaşması yuxarıda sadaladığım digər faktorlarla bağlıdır. Onu deyə bilərəm ki, hazırda Ermənistanda vəziyyət kifayət qədər gərginləşib. Belə görünür ki, hazırkı baş nazir Nikol Paşinyan hakimiyyətdən getməyəcək. Amma Qarabağdakı sülhməramlılarla bağlı Ermənistanın öz mövqeyi var. İrəvan sülhməramlılarla bağlı mövqeyində qətidir”. 

Publika.az