Güləşçilərimizdən dünya çempionatında rekord

Serbiyanın paytaxtı Belqradda 23 yaşadək güləşçilərin dünya çempionatı başa çatıb.

2017-ci ildən keçirilən bu yarışda Azərbaycan güləşi rekord nəticəyə imza atıb.

Belə ki, bundan öncəki üç dünya çempionatında (2017, 2018, 2019) cəmi iki qızıl medal əldə olunmuşdusa, bu dəfə bir yarışda üç güləşçimiz fəxri kürsünün ən yüksək pilləsinə qalxıb.

Belqradda üç qızıl və üç bürünc qazanan Azərbaycan medalların əyarına görə dünya üçüncüsü olub. Ölkəmiz yalnız Rusiya və Ukraynadan geri qalıb.

Xatırladaq ki, yunan-Roma güləşində Həsrət Cəfərov (67 kq) qızıl, Nihad Quluzadə (55 kq), Ülvü Qənizadə (72 kq) bürünc, sərbəst güləşdə isə Əliabbas Rzazadəylə (57 kq) Osman Nurməhəmmədov (92 kq) qızıl, Zirəddin Bayramov (65 kq) isə bürünc medalı boynundan asıblar.

Qafqazinfo