Hadrutda ilk stomatoloji kabinetin həkimi: “10 günə 300 əsgərə xidmət etmişik”

Ötən gün Azərbaycanın işğaldan azad edilən ərazilərindən birində – Hadrutda stomatoloji kabinetin yaradılması ilə bağlı xəbər vermişdik. Bu gözəl təşəbbüsün müəlliflərindən biri olan Ceyhun Səfərov N saylı hərbi hissədə əsgərlərə xidmət etməkdən məmnun olduqlarını deyib. 
Yeniavaz.com oxu.az-a istinadla xəbər verir ki, stomatoloq Ceyhun Səfərov fəaliyyətə dekabrın 12-dən başladıqlarını bildirib:
“Biz dörd nəfər həkim olaraq belə bir addım atmağı düşündük. Hər kəs əsgərlərimiz üçün əllərindən gələni edir. Düşündük ki, belə bir xidmətə də ön cəbhədə onların ehtiyacı olmamış olmaz. Bu ayın 12-dən könüllü olaraq Hadrutda yerləşən N saylı hərbi hissədə stomatoloji xidmətlərə başladıq. İlk fəaliyyətimiz bölüyün tibb otağında oldu. Daha sonra tibb məntəqəsinə stomatoloji kabinet qurduq”.
Həkim deyir ki, dekabrın 12-dən bu günə qədər təxminən 250-300 hərbi qulluqçuya xidmət gəstəriblər:
“Dəqiq saymamışıq, bəlkə də çox olar ki, az olmaz. Əsgər, zabit, gizir MAXE-lərin şikayətlərinə baxırıq. Dişlərini müalicə edir, düzəldirik. Bu bizim öz təşəbbüsümüzdür və davamlı olacağına inanırıq. Bizdən asılı olan və olmayan səbəblər var. Odur ki, mümkün olduqca işğaldan azad olunan digər ərazilərimizdə də bu xidməti yaradacağıq. İnşallah bütün cəbhə boyu bu işləri görmək istəyirik. Ümid edirəm ki, qısa zamanda Şuşada da əsgərlərimizə xidmət etmək nəsib olacaq”.