İndoneziyalı nazir qadınlara qarşı cinsi zorakılığın ifrata çatdığını bildirib

“Hazırda İndoneziyada qadınlara və uşaqlara qarşı cinsi zorakılığa görə fövqəladə vəziyyət hökm sürür”.

Bu barədə Qadınların gücləndirilməsi və uşaqların müdafiəsi naziri Arifa Fauzi qadın problemlərinə həsr olunmuş forumda deyib.

Nazir qadınlara və uşaqlara qarşı zorakılığın qarşısının alınması və aradan qaldırılması üçün nazirliklər və qurumlar arasında sinerji və əməkdaşlığın zəruriliyini vurğulayıb.

“Koordinasiya və sinerji lazımdır, çünki biz bu problemi təkbaşına həll edə bilmərik. Bizim məhdud səlahiyyətlərimiz və büdcəmiz var. Ancaq ümumi şüur və istəklə biz bu problemi birlikdə həll edə bilərik. Qadınların İndoneziya əhalisinin təxminən yarısını, 49,42 faizini, uşaqların isə 31,6 faizini təşkil etdiyini nəzərə alsaq, qadınlara və uşaqlara qarşı zorakılıq məsələlərinin həlli böyük əhəmiyyət kəsb edir. – nazir deyib.

“Qadınlar və uşaqlar millətin və ailənin təməlidir. Buna görə də qadınların səlahiyyətlərinin artırılması və uşaqların müdafiəsi “Qızıl İndoneziya 2045”-in vizyonunu dəstəkləmək üçün strateji prioritetlərdir”, – deyə Fauzi əlavə edib.