İran Fordo nüvə obyektinə sızması ilə bağlı xəbərləri təkzib edir

İran mənbələri İsrailin Mossad vasitəsilə Fordo nüvə obyektinə qarşı komando əməliyyatı həyata keçirməsi barədə xəbərləri təkzib edib və Tehran bunu İsrailin ictimai rəyə təsir etmək məqsədi daşıyan “yalan media müharibəsi”nin bir hissəsi kimi qiymətləndirib.

İran rəsmiləri bəyan ediblər ki, İsrailin kəşfiyyat xidməti Mossad-ın komando əməliyyatı vasitəsilə Fordo nüvə obyektinə sızması ilə bağlı xəbərlər həqiqətə uyğun deyil.

Tehran bu iddiaların ictimaiyyət arasında çaşqınlıq yaratmaq məqsədi daşıyan İsrailin İrana qarşı “yalan media müharibəsinin” bir hissəsi olduğunu vurğulayıb.

İran mənbələri Fars Xəbər Agentliyinə İsrailin irəli sürdüyü iddiaların əsassız olduğunu bildirib.

Agentlik həmçinin bildirib ki, İsrailin Fordo yaxınlığında hərbi enişi əks etdirən fotoların reallıqla heç bir əlaqəsi yoxdur.

Məlumatda qeyd olunub ki, obyektin ətrafında on kilometrlərlə yaşayış məntəqəsi olmayıb.

İsrailin kəşfiyyat agentliyi Mossad cümə axşamı günü ABŞ ordusu tərəfindən bombalandığını iddia etdiyi Fordo nüvə obyektinin dağıdılmasını əks etdirən bir video yayımladı.

ABŞ hesabatı: Nüvə proqramı aradan qaldırılmayıb

Məsələ ilə bağlı Amerikanın CNN kanalının xəbərinə görə , ABŞ Müdafiə Kəşfiyyat İdarəsi və Mərkəzi Komandanlıq tərəfindən hazırlanan ilkin qiymətləndirmə hesabatında Vaşinqtonun İrandakı nüvə obyektlərinə hücumlarının nüvə proqramının infrastrukturunu məhv etmədiyi üzə çıxıb.

Hesabatda deyilir ki, ABŞ-ın İrandakı üç nüvə obyektinə – Fordo, Natanz və İsfahana hücumları Tehranın nüvə proqramı üzrə irəliləyişi yalnız bir neçə ay gecikdirib.

CNN qeyd edib ki, bu qiymətləndirmə daha əvvəl zərbələrin İranın nüvə proqramının böyük bir hissəsini “tamamilə məhv etdiyini” irəli sürən prezident Donald Tramp və müdafiə naziri Pit Heqsetin bəyanatları ilə ziddiyyət təşkil edir.