İranda Mossad üçün çalışan 8 nəfər saxlanıldı

İranın şimal-şərqində yerləşən Rəzəvi Xorasan vilayətində İsrailin xarici kəşfiyyat xidməti Mossadla əməkdaşlıq edən 8 nəfərin tutulduğu açıqlanıb.

İran mediasının məlumatına görə, İslam İnqilabı Keşikçiləri Korpusu (Sepah) Kəşfiyyat Təşkilatı və məhkəmə orqanlarının birgə apardığı əməliyyatlar nəticəsində Mossadla əlaqəli şəbəkə ifşa olunub.

İstintaq materiallarına əsasən, saxlanılan şəxslərin Mossaddan onlayn təlim keçdiyi və bu ilin iyununda İranla İsrail arasında 12 gün davam edən qarşılıqlı hücumlar zamanı İran ərazisindəki həyati və strateji mərkəzlərin koordinatlarını, eləcə də mühüm hərbi şəxslərə dair məlumatları Mossada ötürdüyü müəyyən edilib.

Məlumata görə, həmin şəxslər Məşhəd şəhərində həm mülki, həm də hərbi rəsmilərə qarşı hücumlar planlaşdırıb, mühüm obyektlərdə diversiya fəaliyyətləri həyata keçiriblər. Onların ölkə daxilində fəaliyyət göstərən separatçı qruplarla da əlaqə saxladığı qeyd olunub.

Əməliyyatlar zamanı partlayıcı maddə və bubi tələlərinin hazırlanması üçün istifadə edilən böyük miqdarda xammal da ələ keçirilib.