İsrail Qəzzada tarixi dəyişikliyi görməyə ümid edir – İshak Hersoq

İsrail Qəzzada Livan və Suriyada olduğu kimi tarixi dəyişikliklər görməyə ümid edir.

Trend xəbər verir ki, bunu Davosda keçirilən Dünya İqtisadi Forumunda İsrail prezidenti İsxak Hersoq deyib.

“Biz Livan və Suriyada tarixi dəyişikliklərin şahidi oluruq. Ümid edirik ki, eyni dəyişikliklər Qəzza zolağında da olacaq. Bu, çox səy tələb edəcək”, – Hersoq qeyd edib.

Qəzza razılaşmasından danışan İsrail prezidenti, uğurun açarının girovların azad edilməsi məsələsi ilə bağlı olduğunu vurğulayıb.

“Bu razılaşmaya nail olmaq inanılmaz dərəcədə çətin və ağrılı idi. Bu gün mən Qətərin Baş naziri ilə görüşdüm ki, onun əvəzsiz səylərinə, eləcə də digər vasitəçilərə – Misirə, ABŞ-yə, həm gedən, həm də yeni administrasiyaya təşəkkür edirəm. Girovlarımızın çoxu Qəzzada qalıb. Biz onların tezliklə razılaşmaya uyğun olaraq evlərinə qayıtmaları üçün dua edirik”, – Hersoq vurğulayıb.