İsrail Yaxın Şərqdə ələ keçirdiyi Rusiya silahlarını Ukraynaya göndərir
srail Yaxın Şərqdə hərbi əməliyyatlar zamanı ələ keçirilən Rusiya silahlarını Ukraynaya tədarük etməyə başlayıb.
Musavat.com xəbər verir ki, bu barədə Avropa və dünyanın digər regionlarında hərbi münaqişələri təhlil edən OSINTdefender layihəsi məlumat yayıb.
Bildirilir ki, bu həftə ABŞ Hərbi Hava Qüvvələrinə məxsus bir neçə Boeing C-17 hərbi-nəqliyyat təyyarəsi Almaniyadakı Ramşteyn aviabazasından İsrailin cənubundakı Hatzerim aviabazasına enib, daha sonra Polşanın cənub-şərqindəki Rzeşov şəhərinə yollanıb. Bu şəhər tipli qəsəbə ABŞ və NATO ölkələri tərəfindən Ukraynaya hərbi yardım üçün əsas logistika mərkəzidir.
Mümkün tədarüklərə tanklar, tank əleyhinə idarə olunan raketlər və döyüş sursatları daxildir. OSINTdefender qeyd edir ki, bu, İsrail Hərbi Hava Qüvvələrinin istismardan çıxarmağa hazırlaşdığı və həmçinin Ukraynaya təhvil verməyi düşündüyü bir neçə Patriot zenit-raket batareyalarına əlavədir.
