Kənan Rövşənoğlu: İran geri çəkilmir

Azərbaycanlı jurnalist Tehranın sionist İsraildən mütləq intiqam alacağını bildirib.

“Qaynarinfo”ya açıqlamasında siyasi şərhçi Kənan Rövşənoğlu İranın İsrailə cavab hücum təhdidini geri götürməklə bağlı Qərbin çağırışlarını rədd etməsini şərh edərkən deyib: “İran ən yuxarı səviyyədə elan edib ki, İsrailə cavab veriləcək: Söhbət intiqamdan gedir, İsmayıl Həniyyə İranda qonaq olarkən öldürülüb. Tehran hesab edir ki, onun intiqam haqqı İrandadır. İran da rəsmən elan edib ki, intiqam alacaq. Amma Tehran hələlik tələsmir. Bu bir tərəfdən İsrailə psixoloji təsirdir. Bir ölkəni artıq iki həftədir gərginlik altında saxlayırlar. Digər tərəfdən, bununla Tehran göstərir ki, regionun qüdrətli dövləti odur, hər kəs onunla hesablaşmağa çalışır, nəhayət, ABŞ və Avropa İttifaqı ilə danışıqlar qapısını açıq saxlayır”.

Şərhçi qeyd edib ki, son 10 gündə amerikalılar, ardınca Almanıya və Britaniya baş nazirləri, Fransa prezidenti İran prezidenti ilə danışaraq İsraillə qarşıdurmadan çəkindirməyə çalışıb. Bundan əlavə İsrail ətrafında geniş bir havadan müdafiə çənbəri yaradılıb. Bununla belə, Tehran çalışacaq ki, cavab zərbəsi təsirli olsun, həm də Tehrana qarşı beynəlxalq hərbi koalisiya yaradılmasına səbəb olmasın.

Qeyd edək ki, İranda HƏMAS lideri İsmayıl Həniyyənin şəhadətindən sonra Tehran İsrailə qarşı cavab zərbəsi hazırlayır. Bu fonda ABŞ, Böyük Britaniya, Fransa, Almaniya və İtaliya Tehranı İsrailə qarşı cavab zərbələri vurmaqdan çəkinməyə çağıran birgə bəyanatla çıxış ediblər. Lakin görünən odur ki, İran cavab zərbəsində israrlıdır. Belə ki, İran avqustun 13-də İsrailə cavab hücumu təhdidini geri götürməklə bağlı Qərbin çağırışlarını rədd edib. İran XİN-in sözçüsü Nasir Kənani deyib ki, belə bir xahişin “siyasi məntiqi yoxdur, beynəlxalq hüququn prinsip və qaydalarına ziddir”, İsrailə “açıq və praktik” dəstək deməkdir.