New York Times: İstanbul Rusiyanın taktiki qələbəsindən danışır

“New York Times” qəzeti atəşkəs ilkin şərti olmadan başlayan İstanbul danışıqlarını Rusiyanın taktiki qələbəsi kimi dəyərləndirib, lakin döyüşlərin dayandırılması ilə bağlı qərarın verilmədiyini qeyd edib.

The New York Times (NYT) qəzeti Ukraynadakı həll problemi ilə bağlı İstanbulda son danışıqların Rusiya rəhbərliyinin taktiki qələbəsi demək olduğunu yazıb.

Qəzet qeyd edib ki, Moskva atəşkəs olmadan Kiyevlə birbaşa dialoqa başlamağa müvəffəq olub, bu, Ukrayna və əksər Qərb ölkələrinin israr etdiyi əsas ilkin şərtdir.

Mayın 16-da tərəflər arasında təxminən bir saat yarım davam edən birbaşa danışıqlar aparılıb, sonunda hər tərəfdən min nəfərin iştirakı ilə genişmiqyaslı məhbus mübadiləsinə dair razılıq əldə olunub.

Bununla belə , NYT münaqişənin dayandırılması və ya iki ölkə liderlərinin görüşməsi ilə bağlı heç bir razılığın əldə olunmadığını vurğulayıb.

Bundan başqa, qeyd olunub ki, Rusiya tərəfi Ukrayna qoşunlarının dörd yeni rayonun ərazisindən tamamilə çıxarılması tələbini ifadə edib.

Qəzetin mənbələrinin fikrincə, bu hallar tərəflərin mövqelərini dalana yaxınlaşdırır və Moskvanın ciddi kompromis əldə etmək istəyinə şübhələr yaradır.

Həmçinin bildirilir ki, Rusiya prezidenti Vladimir Putin sərt ritorikasına və tələblərinə baxmayaraq, dünyaya, xüsusən də ABŞ prezidenti Donald Trampa danışıqlara hazır olduğunu göstərməyə çalışır.

Bu kontekstdə qeyd olunub ki, İstanbulda danışıqlar təşəbbüsü Vaşinqtona Rusiyanın mövqeyinin çevikliyi ilə bağlı siqnal kimi qəbul edilə bilər.

Əvvəllər bildirilirdi ki, Tramp Birləşmiş Ərəb Əmirliklərinə səfəri zamanı Ukraynadakı münaqişənin həllini müzakirə etmək üçün Putinlə şəxsi görüşün vaxtının yetişdiyini deyib.

Sonuncu dəfə Rusiya ilə Ukrayna arasında birbaşa danışıqlar 2022-ci ilin yazında olub. Mayın 16-da keçiriləcək görüş təklifi mayın 11-də Putindən gəlib.