Niderland İsrailin iki naziri haqqında “persona non grata” qərarı verdi
Sizinyol xarici KİV-ə istinadən xəbər verir:
Niderland hökuməti İşğalçı İsrailin Milli Təhlükəsizlik naziri İtamar Ben-Qvir və Maliyyə naziri Bezalel Smotriçi ölkəyə girişinə qadağa qoyaraq onları persona non grata elan edib.
Bu qərar onların Qəzzada zorakılığı təşviq etməsi, etnik təmizləməni dəstəkləməsi və işğal altındakı İordan çayının qərb sahilində qanunsuz yaşayış məntəqələrinin genişləndirilməsini təşviq etməsi ilə əlaqələndirilir.
Niderlandın Xarici İşlər naziri Kaspar Veldkamp parlamentə təqdim etdiyi məktubda bildirib ki, bu iki nazir dəfələrlə fələstinlilərə qarşı zorakılığı təşviq edib, qanunsuz məskunlaşmaları müdafiə edib və Qəzzada etnik təmizləməni açıq şəkildə dəstəkləyib.
Bu diplomatik addım Niderlandın İsrailə qarşı təzyiqlərini artırmaq strategiyasının bir hissəsidir. Hökumət həmçinin Avropa İttifaqına İsrailə qarşı sanksiyalar tətbiq etməyi və ixrac məhdudiyyətləri qoymağı tövsiyə edir.
Ben-Qvir və Smotriç qərara sərt reaksiya verərək Avropanı radikal islamın yalanlarına təslim olmaqda və antisemitizmin yüksəlişini təşviq etməkdə ittiham ediblər. Onlar sosial şəbəkələrdə yayımladıqları açıqlamalarda Avropada yəhudi nazirlərin qəbul edilmədiyini, terrorçuların isə sərbəst buraxıldığını iddia ediblər.
Ekspertlər bu qərarı İsrailin sağçı hökumət üzvlərinə qarşı beynəlxalq təcridin güclənməsi kimi qiymətləndirirlər. Niderlandın bu addımı digər Avropa ölkələrini də oxşar tədbirlər görməyə təşviq edə bilər.
