Pezeşkian: Biz İsraili yenidən hədəf almağa hazırıq
İran prezidenti Məsud Pizişkian bəyan edib ki, Tehran İsrailin istənilən hərbi əməliyyatına müqavimət göstərməyə və Tel-Əvivi yenidən hədəfə almağa hazırdır.
İran prezidenti Məsud Pizişkian Tehranın sionist rejimin istənilən hərbi əməliyyatı ilə üzləşməyə və Tel-Əvivi yenidən hədəfə almağa hazır olduğunu vurğulayıb və ölkəsinin uranın zənginləşdirilməsindən və nüvə proqramından əl çəkməyəcəyini bildirib.
Pizişkian İslam Respublikasının lazım gələrsə, birbaşa münaqişəyə girmək qabiliyyətinə malik olduğunu təkrar edərək, “Biz müharibə istəmirik, lakin atəşkəsin əminliyinə də inanmırıq. Özümüzü güc yolu ilə müdafiə edəcəyik” deyib.
Pizişkian bildirib ki, illərdir “İran daxilində xaos yaratmağa, rejimi alt-üst etməyə və ölkəni parçalamağa” çalışan İsrail öz məqsədlərinə nail ola bilməyib.
Ölkə daxilində bəzi sızmaların “Amerika texnologiyası” sayəsində mümkün olduğunu ifadə edən Pizişkian, “Təl-Əviv raket hücumlarımızın müvəffəqiyyətindən kimsənin danışmasına mane olur, lakin İsrailin gərginliyi azaltma çağırışı bu hücumların təsirinin açıq sübutudur” dedi.
O, ona qarşı sui-qəsd cəhdi ilə bağlı “Bu hadisə İsrailin hərbi liderlərdən sonra siyasi liderlərə sui-qəsd cəhdlərinin bir hissəsidir” deyib.
“Nüvə qabiliyyətimiz alimlərimizin ağlındadır”
Nüvə faylından danışan Pizişkian İranın nüvə silahına malik olmamaq öhdəliyini bir daha təkrarlayıb.
O qeyd edib ki, bu mövqe Qərbin təzyiqlərinə deyil, İnqilab Rəhbərinin fitvasına əsaslanan “siyasi, dini və strateji” mövqedir.
“Biz nüvə silahına malik olmamağa razıyıq, lakin beynəlxalq hüquqa uyğun olaraq uranı zənginləşdirməyə davam edəcəyik və təhdid və ya məcburiyyətləri qəbul etməyəcəyik”, – Pizişkian əlavə edib.
“Nüvə proqramımızın bitdiyini düşünənlər yanılır. Bizim obyektlərimiz hər şey deyil, çünki nüvə bilikləri artıq alimlərimizin beynindədir”.
Əl-Cəzirə ilə eksklüziv müsahibəsində Pizişkian gələcək danışıqların “qazan-qazan” prinsipinə əsaslanmalı olduğunu vurğulayaraq deyib: “İran təslim olmayıb və təslim olmayacaq, bu hamıya aydındır. Bununla belə, biz diplomatiya və dialoqa inanırıq”.
“Biz hədələri və əmrləri qəbul etmirik. Donald Tramp deyir ki, İran nüvə silahına malik olmamalıdır və biz bunu Trampın sözlərinə görə deyil, İnqilab Rəhbərinin fitvasına əsaslanaraq qəbul edirik”, – Pizişkian deyib.
“Əl-Udeyd Qətər demək deyil”
İran prezidenti İsrailin ölkəsinə hücumlarından sonra Qətərdəki Amerika əl-Udeyd aviabazasının hədəfə alınması ilə bağlı mövqeyini də açıqlayıb.
“Biz Qətər dövlətinə hücum etməmişik və edə bilmərik. Qətər bizim üçün qardaş ölkədir, xalqı isə bizim qardaşımızdır”, – Pizişkian deyib.
Tehranın mövqeyini Dohaya bildirdiyini və hücum əməliyyatının təfərrüatlarını açıqladığını qeyd edən Pizişkian, İranın hücumunun Qətəri deyil, “bizim bombardmanda iştirak edən Amerika bazasını” hədəf aldığını bildirib.
“Bizimlə Qətər əmiri arasında ümumi anlaşma var və biz onlara bütün sahələrdə kömək etməyə hazırıq”, – Pizişkian əlavə edib.
