Rusiya XİN: Avropanın “snapback” iddiaları əsassızdır, diplomatiya imkanı hələ də qalır
Rusiya Xarici İşlər Nazirliyi Avropa ölkələrinin İranla bağlı “snapback” mexanizmini işə salmaq cəhdlərini kəskin şəkildə pisləyərək, beynəlxalq ictimaiyyəti bu addımları rədd etməyə çağırıb.
Nazirliyin açıqlamasında qeyd olunub:
“Avropa ölkələrinin bu hərəkətlərini qətiyyətlə qınayırıq və beynəlxalq ictimaiyyəti onları rədd etməyə dəvət edirik. Bu cür manipulyasiyalar digər dövlətlər üçün heç bir hüquqi öhdəlik yarada bilməz.”
Rusiya XİN həmçinin bildirib ki, mövzunun heç bir hüquqi əsası yoxdur. Moskva BMT-də Avropanın iddialarının uyğunsuzluğunu və əsassızlığını ortaya qoyan ətraflı təhlil paylayıb. Açıqlamada, Çinin də bu məsələ üzrə detallı arqumentlər təqdim etdiyi vurğulanaraq, “Mövzu yeni deyil” ifadəsinə yer verilib.
“Gərginliyin qarşısının alınması vacibdir”
Nazirlik bəyan edib ki, İranın nüvə proqramı ətrafında bu ilin iyununda baş verən hücumların da göstərdiyi kimi, yeni bir eskalasiyanın beynəlxalq sülh və təhlükəsizlik üçün ağır nəticələr doğuracağı açıqdır:
“Hazırda əsas vəzifə – tərəflər arasında dialoq qurmaq, İran nüvə proqramına dair bir həll yolu tapmaq və yeni bir münaqişənin qarşısını almaqdır.”
Rusiya XİN Avropa dövlətlərini xəbərdarlıqla yanaşı tənqid edib:
“Nüvə sazişinin iştirakçısı olan Avropa ölkələri hüquqi çərçivədən çıxaraq digər dövlətləri özbaşınalığa təşviq etməklə pozucu mövqelərini daha da dərinləşdirirlər. Bu isə qınanmalı və qəbuledilməzdir. Onları geri dönülməz nəticələrə səbəb olmadan əvvəl səhv qərarlarını yenidən nəzərdən keçirməyə çağırırıq. Təhranla üz-üzə gəldikləri bu toqquşma xəttinin heç bir gələcəyi yoxdur.”
Nazirliyin fikrincə, Avropa ölkələrinin hələ də konstruktiv addım atmaq imkanı qalır:
“Rusiyanın və Çinin BMT Təhlükəsizlik Şurasında təqdim etdiyi qətnamə layihəsini dəstəkləməklə onlar ortaq işə müsbət töhfə verə bilərlər. Diplomatiya yolundan imtina etmələri halında doğacaq nəticələrin məsuliyyətinin nə qədər ağır olacağının fərqində olaraq bu fürsəti dəyərləndirəcəklərinə ümid edirik.”
Xatırladaq ki, İngiltərə, Fransa və Almaniya 28 avqustda BMT Təhlükəsizlik Şurasına müraciət edərək, 2015-ci il nüvə sazişi ilə ləğv olunmuş İran sanksiyalarının yenidən qüvvəyə minməsi üçün mexanizmi işə saldıqlarını açıqlamışdılar. Lakin sanksiyalar dərhal qüvvəyə minmir. BMT Təhlükəsizlik Şurasında onların ləğv olunması ilə bağlı qərarın davam etdirilməsinə dair qətnamə səsverməyə çıxarılmalıdır. Əgər belə qərar 30 gün ərzində qəbul edilməsə, sanksiyalar avtomatik olaraq bərpa ediləcək.
