Şəhid olacağı günü bir il öncədən söyləmişdi: ƏN AZYAŞLI QƏHRƏMANIMIZ
O hələ sağlığında bilirdi ki, qələbə bizim olacaq.
“Tiqana” ləqəbli şəhid Samir Əliyev 1977-ci il 9 avqust tarixində Cəbrayıl rayonunun Qaracallı kəndində, zəhmətkeş insanlardan olan Qədir Əliyevin ailəsində anadan olub. Ona “Tiqana” ləqəbinin verilməsinin səbəbi o dövrdə məşhur olan fransız futbol mütəxəssisi – Jan Tiqanaya olan zahiri bənzərliyidir.
Samir Əliyev 1984-cü ildə qonşu kənddə yerləşən Bolyand kənd orta məktəbinə gedib. 6-cı sinifdən sonra təhsilini Doşulu kənd məktəbində davam etdirib. Ta ki 8-ci sinfə qədər…
1992-ci ildən başlayaraq Erməni silahlı qüvvələrinin işğalçılıq siyasəti Cəbrayıl rayonunu da öz ağuşuna alıb. Düşmənə müqavimət göstərmək üçün döyüşçülərlə yanaşı, rayon sakinləri də silaha sarılaraq savaş meydanına atılıb. Həmin vaxt öz istəyi ilə məktəbdən ayrılan Samir azyaşlı olmağına rəğmən könüllü olaraq İmişli batalyonunun dəstəsinə yazılıb.
Cəbrayılda elə bir müdafiə xəttimiz yoxdur ki, orda Samirin əsgərlərimizə yardımı olmasın. O, çəkinmədən, qorxmadan Cəbrayılın Quşçular postundan başlayaraq, Məzrə postuna qədər ən gərgin döyüşlərin içərisində olub.
Qaracallı kəndinin işğal edilməsi sakinlərin digər kəndlərdə məskunlaşmasına səbəb olub. Həmin vaxt ailəsi Samiri ordudan ayırmaq istəsə də, uşaq olduğunu dilə gətirsələr də, fayda etməyib. Samir şəhid olmamışdan əvvəl sanki hiss etmişdi ki, həmkəndlisi, dostu, Qarabağ müharibəsi şəhidi Mirələmin 1-ci anım günündə bu dünyadan ayrılacaq. Çünki qəhrəmanımız hər kəsə Mirələmin ili günü şəhid olacağını deyib. Döyüşlər vaxtı bir dəfə yaralanan Tiqana 15 avqust 1993-cü ildə Xocavənd rayonunda gedən şiddətli döyüşlər zamanı qəhrəmancasına şəhid olub.
Samir Əliyevin məzarı Cəbrayıl rayonunun Şükürbəyli kəndində yerləşir. 4 oktyabr 2020-ci ildə ordumuzun Cəbrayıl rayonu azad etməsi ilə şəhidin məzarı da işğaldan qurtulub. İllər sonra şəhidin məzarı doğmaları tərəfindən yenidən ziyarət olunub.
