Salam və Abbas Fələstin müqavimətini tərksilah etmək barədə razılığa gəliblər
Livanın baş naziri Navaf Salam və Fələstin Muxtariyyətinin prezidenti Mahmud Abbas Livan ərazisindəki bütün silahların, o cümlədən Fələstin düşərgələrinin dövlət nəzarətinə verilməsi barədə razılığa gəliblər. Görüşdə Qəzzada müharibənin dayandırılması, humanitar yardımların çatdırılması və iki dövlətli həllin əhəmiyyəti vurğulanıb.
Livanın Baş naziri Navaf Salam və Fələstin prezidenti Mahmud Abbas Livan ərazisindəki bütün silahların, o cümlədən Fələstin düşərgələrinin Livan dövlətinin tam suverenliyi altında olması barədə razılığa gəliblər.
Tərəflər silahların dövlət nəzarətinə keçməsini təmin etmək məqsədi ilə Fələstin silahlarının həm düşərgələrin daxilində, həm də xaricində tam toplanmasını razılaşdırıblar.
Bu sazişlərin icrasına nəzarət etmək üçün birgə rəhbər komitə yaradılacaq.
Abbasın Beyrutdakı hökumət binasına səfəri zamanı baş tutan görüşdə Salam və Abbas Livandakı fələstinlilərin “qonaq” statusuna malik olduqlarını və Livan dövlətinin qərarlarına əməl edəcəklərini bildiriblər.
İki lider fələstinli qaçqınların geri qayıtmaq hüququna sadiqliklərini təkrarlayaraq, köçürülmə planlarını rədd etdilər.
Onlar həmçinin qaçqınların humanitar şəraitinin yaxşılaşdırılması üçün birgə işin və onların hüquqları ilə bağlı məsələlərin həllində əməkdaşlığın vacibliyini vurğulayıblar.
Bildirilib ki, bu səylər Livanın suverenliyinə zərər vermədən həyata keçirilməlidir.
Görüş zamanı Qəzza zolağındakı gərginlik də müzakirə olunub.
Salam və Abbas İsrail ordusunun Qəzzaya hücumlarının dayandırılmasına və Fələstin xalqının öz torpaqlarından qovulmasına qarşı olduqlarını bildiriblər.
Onlar hərtərəfli atəşkəs, Qəzzanın bütün bölgələrinə humanitar yardımın çatdırılması, Qəzzanın yenidən qurulması, İsrail ordusunun ərazidən çıxarılması və Qəzzanın Fələstin Administrasiyası tərəfindən idarə olunması barədə razılığa gəliblər.
Onlar regiondakı münaqişənin ədalətli və hərtərəfli həlli kimi iki dövlət həllinə sadiq olduqlarını bir daha bəyan ediblər.
