Şeyxə hücum edən fitnəkarlar
Qafqaz Müsəlmanları İdarəsinin sədri, Şeyxülislam Allahşükür Paşazadə bəzi media orqanlarının hədəfindədir. Əlbəttə, Şeyx hər zaman medianın diqqət mərkəzində olub, haqqında tənqidi məqalələr yazılıb. Bu səfər də belə qəbul etmək olardı. Amma yazıların ard-arda gəlməsi göstərir ki, QMİ sədrinə qarşı məqsədli kampaniya aparılır.
Kampaniyanın necə deyərlər, çıxış nöqtəsi isə QMİ sədrinin məlum Şuşa səfəri və daha sonra Bakıda Qurban bayramı günü səsləndirdiyi fikirlər olub. İlk olaraq Şeyxülislamın Şuşada məsciddə İran dini liderinin Bakıdakı nümayəndəsi Seyid Əliəkbər Ocqanejadın arxasında dayanıb namaz qıldığını göstərən fotolara görə hücumlar baş verdi. Hətta daha sonra Şuşa məscidində qılınan namazın fotolarının yayılmasına, imam-camaatın Şeyxülislam olduğu təsdiqlənməsinə baxmayaraq hücumlar davam etdi.
Növbəti hücum dalğası isə Şeyxin Bakıda Qurban bayramı günü Təzəpir məscidində etdiyi çıxışda İranın dini liderinə təşəkkür etməsindən sonra başladı. Şeyxülislam məlum çıxışında Qarabağdakı sonuncu qalibiyyətli müharibəni, şəhidləri yad edib və ardınca müharibədə Azərbaycana dəstək verən ölkələrə təşəkkür edib, bu zaman xüsusi olaraq qonşu müsəlman ölkələri olaraq Türkiyə və İranı ayrıca qeyd edib, hər iki ölkəyə, Türkiyə prezidenti və İranın dini liderinə təşəkkür edib. qeyd edib ki, Azərbaycanın qələbəsində Ayətullah Seyid Əli Xameneyinin Qarabağla bağlı fətvasının rolu olub.
Amma diplomatik və siyasi etiketi qoruyan bu çıxışa görə QMİ sədrinə hücum dalğası başlayıb. Bəzi media orqanları hətta bir qədər irəli gedərək Şeyxi istefaya çağırıblar. Onu siyasəti bilməməkdə (!?), dövlətin siyasətinə zidd getməkdə ittiham ediblər. Artıq QMİ sədri özü də ittihamlara cavab verib. Sözlərinin kontekstdən çıxarıldığını bildirib.
Əlbəttə, ictimai-siyasi xadim, ölkənin formal dini lideri olan bir adamın mediada tənqid edilməsi qeyri-adi hadisə deyil. Buna qədər də yerli mətbuatda Şeyxülislam haqqında tənqidi materiallar dərc olunub. Ancaq indi müəyyən media orqanlarının sanki bir mərkəzdən idarə olunan, heç bir əsaslı dəlil olmadan sadəcə QMİ sədrini, onun şəxsiyyətini və təmsil etdiyi dini qurumu hədəfə alan yazıları cəmiyyətdə ciddi qınaqla qarşılanıb və sosial şəbəkələrdə dərin parçalanmaya səbəb olub.
Şeyxülislam təcrübəli şəxs və uzun illərin təcrübəsinə sahib biri kimi, aydın məsələdir ki, hər zaman dövlətin siyasi xətti ilə uyğunlaşdırır. Onun dövlət rəhbərliyinin siyasi kursuna qarşı olması, Azərbaycan dövlətçiliyi üçün zərərli xətdə olması inandırıcı deyil. Konkret olaraq son çıxışı isə daha əvvəl Azərbaycan prezidenti İlham Əliyev və prezidentin köməkçisi Hikmət Hacıyevin, habelə Xarici İşlər naziri Ceyhun Bayramov səsləndirdiyi fikirlərlə üst-üstə düşür. Əgər Şeyxin fikri zərərli olsaydı, məntiqlə tənqidçilər İlham Əliyevi, H.Hacıyevi tənqid etməli idi. Amma Şeyxin hədəfə alınması və onun Qarabağ savaşında Ayətullah Xameneyinin fətvası ilə bağlı dediklərinin tənqidə səbəb olması məsələnin yalnız Şeyxin personası deyil, həm də din amili olduğunu göstərir.
Azərbaycan dövlət rəhbərliyi həm 44 günlük müharibə, həm də ondan sonrakı dövrdə qonşu ölkələrlə dostluq siyasətini möhkəmləndirib. Çünki müharibədə Azərbaycanın qələbəsində həm də dövlət başçısının ağıllı siyasi-diplomatik gedişlərinin xüsusi rolu olub. Məhz bu siyasət nəticəsində, ölkə başçısının qeyd etdiyi kimi, qonşu ölkələr öz sərhədlərini Ermənistana silah daşınmasına bağladı. Prezident İlham Əliyev çıxışlarında bunu xüsusi olaraq qeyd edib.
Müharibədən sonra da Azərbaycan prezidenti Türkiyə ilə yanaşı, İranla və Gürcüstanla dostluq əlaqələrinin yüksək səviyyədə olmasına çalışdığını ortaya qoyub. Bu mənada Şeyxülislamın Şuşada və Bakıdakı jestləri ölkə prezidentinin bu siyasi kursunun davamı, onun möhkəmlənməsinə xidmət edir.
Hazırda Şeyxülislama hücumlar cəmiyyətdə yalnız QMİ sədrinə deyil, həm də milli dini institutlara, ümumiyyətlə dini dəyərlərə hücum kimi qiymətləndirir. Cəmiyyətin böyük bir qisminin Şeyxin müdafiəsi üçün səfərbər olmasının arxasında yatan amil də məhz budur. Belə görünür ki, hansısa gizli qüvvələr Şeyx üzərindən Azərbaycan illər ərzində formalaşmış dini sahədəki həmrəylik mühitini zəiflətmək, cəmiyyət içərisində parçalanmanı dərinləşdirməyə çalışır. Şeyxin məhz Türkiyə Prezidentinin müşaviri vasitəsilə tənqid olunması ölkəmizdəki sabit, tolerant dini mühiti sarsıtmağa, dini zəmində bölücülüyü dərinləşdir xidmət edir.
Hər bir halda aydındır ki, bu təxribatı ortaya atan və onu qızışdırmağa çalışanlar Azərbaycan xalqının və dövlətinin düşmənləri, ölkədəki milli birliyi zədələməyə çalışan qruplardır. Başqa sözlə bu bir fitnədir. Müqəddəs kitab isə fitnəni qətldən də qorxulu cinayət adlandırır. Buna görə də fitnəyə qarşı ayıq olmaq, milli dəyərləri və onu mühafizə edənləri qorumaq lazımdır.
Salamnews
