Sloveniya Fələstini dövlət kimi tanıyan Avropa İttifaqı ölkələrinə qoşulub

İspaniya, Norveç və İrlandiyadan sonra Sloveniya Fələstin dövlətini tanıyan Avropa İttifaqı ölkələrinə qoşulub. Bu ölkələr İsraili Qəzzaya hücumlarına görə qınayır və “dərhal” atəşkəsə çağırır.

Sloveniya parlamenti səs çoxluğu ilə Fələstini dövlət kimi tanıyıb.

Keçən həftə Avropa İttifaqına üzv ölkədəki hökumət Fələstin dövlətinin tanınması təklifini bəyənib və qərarın qüvvəyə minməsi üçün tələb olunan yekun təsdiq üçün təklifi parlamentə təqdim edib.

90 yerlik parlamentdə səsvermə zamanı rədd səsi olmasa da, 52 deputat lehinə səs verib. 38 deputat bitərəf qalıb.

Sloveniyanın qərarı İsrailin hücumlarını sərt şəkildə pisləyən İspaniya, Norveç və İrlandiyanın mayın 22-də Fələstini dövlət kimi tanımasından sonra verilib.

Birləşmiş Millətlər Təşkilatının üçdə ikisindən çoxunu təşkil edən 140-dan çox ölkə Fələstin dövlətini rəsmən tanıyır. Lakin Qərbi Avropanın əksər ölkələri, o cümlədən ABŞ, Kanada, Avstraliya, Yaponiya və başqaları Fələstini hələ də tanımır.

Avropa İttifaqında indiyədək ümumilikdə 7 ölkə Fələstinin dövlət statusunu tanıyıb. İsveç 2014-cü ildə Aİ-də ilk addımı atarkən, Bolqarıstan, Çexiya, Macarıstan, Kipr, Polşa və Rumıniya Aİ-yə üzv olmadan əvvəl Fələstini tanıyıb.

İrlandiya, Malta və Sloveniya liderləri martın 22-də İspaniyanın baş naziri Pedro Sançeslə birgə bəyanatda “şərtlər uyğun olduqda” Fələstini tanımağa hazır olduqlarını bildiriblər. Bu səbəbdən Sloveniyadan sonra Maltanın da oxşar addım atacağı gözlənilir.