Suriya ordusu Həmadan geri çəkilib

Suriya ordusu silahlı qrupların Həma şəhərinə qarşı intensiv hücumları qarşısında mülki əhalinin təhlükəsizliyini təmin etmək üçün əsgərlərinin mövqelərini dəyişdirdiyini açıqlayıb.

Suriya ordusu son günlər silahlı qrupların Həma şəhərinə qarşı intensiv hücumları ilə mübarizə aparır.

Baş Qərargahdan verilən açıqlamaya görə, silahlı qruplar müxtəlif nöqtələrdən və çoxlu sayda hücumlarda ağır silahlar və müxtəlif hərbi texnikadan istifadə edib.

Hücumlar gücləndikcə, toqquşmalar zamanı Suriya ordusunun çoxlu əsgəri həyatını itirib.

Qarşıdurmaların intensivliyi və bəzi nöqtələrə silahlı qrupların sızması səbəbindən Suriya ordusu Həmada dinc əhalinin təhlükəsizliyini təmin etmək və şəhərdə müharibə riskinin qarşısını almaq üçün qoşunlarını şəhərdən kənara köçürüb.

Açıqlamada bu qərarın bütünlüklə mülki şəxslərə dəyən zərərin qarşısının alınmasına yönəldiyi vurğulanıb.

Suriya Ordusu Həmada nəzarəti bərpa etmək və silahlı qruplaşmaları zərərsizləşdirmək üçün əməliyyatları qətiyyətlə davam etdirəcəyini açıqlayıb.

Silahlı qrupların böyük itki verdiyi bildirilərkən, ordunun milli borcunu yerinə yetirmək üçün mübarizəni davam etdirəcəyi bildirilib.