Times of Israel: İsrail ordusu çox cəbhəli müharibəyə hazırlaşır

İsrailin Baş Qərargah rəisi Eyal Zamir bəyan edib ki, ordu Qəzzada davam edən münaqişə və regional təhlükələr qarşısında çox cəbhəli və uzunmüddətli əməliyyata hazır olmalıdır.

“Times of Israel” qəzetinin məlumatına görə , İsrail Baş Qərargah rəisi general-leytenant Eyal Zamir bəyan edib ki, ordu Qəzzada davam edən münaqişə və ölkə sərhədlərində artan gərginlik fonunda “mürəkkəb və çətin” təhlükəsizlik mühitinə qarşı çox cəbhəli, uzunmüddətli əməliyyata hazır olmalıdır.

Məlumata görə, Zamir iki ildən sonra ilk dəfə keçirilən çoxtərəfli vəziyyətin qiymətləndirilməsi toplantısında dünən yüksək səviyyəli generallarla əməliyyat, kəşfiyyat və strateji vəziyyəti müzakirə edib.

“İsrail ordusu bütün cəbhələrdə və sərhədlərimiz boyunca lazımi müdafiə qabiliyyətini saxlamalı, eyni zamanda bir çox arenada hücum imkanlarına sahib olmalıdır”, – deyə Zamir bildirib. O əlavə edib ki, onlar hava üstünlüyünü qoruyub saxlamağa və kəşfiyyat səylərini inkişaf etdirməyə davam edəcəklər.

Qəzzada baş verən müharibəni “İsrail ordusunun indiyə qədər üzləşdiyi ən mürəkkəb münaqişələrdən biri” kimi xarakterizə edən Zamir, ordunun bu prosesdə əldə etdiyi nailiyyətləri tərifləməklə yanaşı, hərbi itkilərin “ağır bədəli”nə də diqqət çəkib.

İordan çayının qərb sahilində davam edən əməliyyatların, Livanda Hizbullaha qarşı fəaliyyətlərin və Suriyadakı İran hədəflərinə hücumların “davam etməli olduğunu” vurğulayan Zamir, “İran və onun oxu hələ də hədəfimizdir. İrana qarşı kampaniya hələ bitməyib” deyib.

Times of Israel xəbər verir ki, Zamir 2026-cı ili hazırlığın gücləndirilməsi, imkanların yenidən qurulması və əməliyyat imkanlarının qiymətləndirilməsi ili kimi təsvir edib.