Tramp: Bir sıra ölkələr “İbrahim müqavilələri”nə qoşulmaq istəyir

ABŞ prezidenti Donald Tramp bir sıra ölkələrin “İbrahim müqavilələri”nə qoşulmaq istədiyini açıqlayıb.

APA-nın məlumatına görə, “FOX News” telekanalına müsahibəsində bu barədə danışan Ağ Ev rəhbəri artıq həmin ölkələrin bu sənədi imzalaması üçün maneə qalmayıb:

“Bu yolda əsas problem İran idi. Hesab edirəm ki, artıq sənədə qoşulmaq istəyənlərin müraciətinə müsbət cavab verəcəyik”.

Qeyd edək ki, “İbrahim müqavilələri”ni 13 avqust 2020-ci ildə İsrail, Birləşmiş Ərəb Əmirlikləri və ABŞ imzalayıb.

Sənəd 1978-ci il Misir Sülh razılaşması və 1994-cü il İordaniya Sülhündən sonra ilk dəfə bir ərəb dövləti ilə İsrail arasında normal münasibətlərin yaradılmasını nəzərdə tutur.

Müqaviləyə 2020-ci il, sentyabrın 15-də Ağ Evdə Bəhreynin xarici işlər naziri Əbdüllətif bin Rəşid Əl Zayani və BƏƏ xarici işlər naziri Abdulla bin Zayed Əl Nəhyan və İsrailin baş naziri Benyamin Netanyahu arasında imza atılıb.