UNICEF-in dəhşətli hesabatı: İsrailin son hücumlarında yüzlərlə qəzzəli uşaq şəhid olub

BMT-nin Uşaq Fondu sionist rejimin bölgəni yenidən bombardman etməyə başlamasından bu yana Qəzzədə ən azı 322 uşağın şəhid olduğunu açıqlayıb.

UNICEF bildirib: “Atəşkəsin pozulması və Qəzzə zolağında güclü bombardmanların və quru əməliyyatlarının bərpası ən azı 322 uşağın ölümü və daha 609 uşağın yaralanması ilə nəticələnib. Başqa sözlə, son on gündə hər gün yüzdən çox uşaq öldürülüb və ya şikəst edilib.”

“Bu uşaqların əksəriyyəti köçkün olub və müvəqqəti çadırlara və ya zədələnmiş evlərə sığınıblar” – deyə, UNICEF hesabatında əlavə edib.

Təşkilat qeyd edib ki, bu rəqəmə Qəzzə zolağının cənubundakı Xan Yunisdəki Nasir xəstəxanasının təcili yardım şöbəsinə edilən hücumda ölən və ya yaralanan uşaqlar da daxildir.

UNICEF-in icraçı direktoru Ketrin Rassel açıqlamasında deyib: “Atəşkəs Qəzzə uşaqlarının çox ehtiyac duyduğu təhlükəsizlik şəbəkəsini təmin etdi.”

“Uşaqlar indi yenidən ölümcül zorakılıq və məhrumiyyət girdabında boğulurlar” – deyə, o əlavə edib.

Sionist rejim təxminən iki həftə əvvəl, martın 18-də Qəzzəni yenidən bombardman etməyə başlayıb və daha sonra bölgədə qurudan yeni hücuma keçib. Beləliklə, HƏMAS-la müharibədə müvafiq danışıqlarda dalana dirəndikdən sonra təxminən iki aya yaxın davam edən atəşkəs başa çatıb.