WSJ: Netanyahu Həması silah gücü ilə məğlub edə biləcəyini düşünür

Wall Street Journal-ın mənbələrinə görə, İsrailin baş naziri Netanyahu və onun yeni milli təhlükəsizlik komandası HƏMAS-ı məğlub etmək üçün Qəzza zolağında genişmiqyaslı quru əməliyyatı keçirməyi planlaşdırır.
Wall Street Journal qəzetinin adı açıqlanmayan mənbələrə əsaslanan xəbərinə əsasən, sionist rejim Qəzza zolağında genişmiqyaslı quru əməliyyatına başlamağı planlaşdırır.
İsrailin baş naziri Benyamin Netanyahu və onun yeni milli təhlükəsizlik komandası hesab edir ki, “Qəzza ərazisinin bir hissəsinin işğalı və nəzarəti HƏMAS-ın məğlubiyyətini təmin edəcək”.
Qəzet yazır ki, Netanyahu və onun son aylarda təyin olunmuş yüksək səviyyəli köməkçiləri komandası Qəzzanın gələcəyi üçün hər hansı siyasi həll yolu tapılmadan əvvəl Fələstin müqavimətinin hərbi güclə məğlub edilməsinin zəruriliyi fikrindədir.
Qəzet həmçinin yazıb ki, Netanyahu və komandası keçən il Hizbullahın Livanda hərbi məğlubiyyətə uğraması və ABŞ prezidenti Donald Tramp administrasiyasının HƏMAS-a qarşı hücumu dəstəkləməyə hazır olmasının onlara daha çox döyüşmək azadlığı verdiyinə inanır.
Komandanın tərkibinə müdafiə naziri Yisrael Katz və Baş Qərargah rəisi Eyal Zamir də daxildir.
Sionist rejim yanvar ayında əldə edilmiş atəşkəs razılaşmasını pozaraq, martın 18-də Qəzza zolağına hücumlarını bərpa edib və bölgəyə böyük hücumlar təşkil edib.
Qəzza Səhiyyə Nazirliyinin məlumatına görə, oktyabr ayından bu yana Qəzza zolağında aparılan hərbi əməliyyatlarda həlak olan fələstinlilərin sayı 50 mini keçib.