Yəmən Ben Qurion hava limanını hədəfə alıb (ətraflı)

Yəmən Silahlı Qüvvələri Fələstin xalqına dəstək olaraq işğal altındakı Yaffa bölgəsindəki Ben Qurion hava limanına ballistik raket hücumu həyata keçirdiklərini açıqlayıb.

Yəmən Silahlı Qüvvələrinin sözçüsü Yəhya Seri verdiyi açıqlamada, qüvvələrin bu səhər Ben Qurion hava limanını hədəf aldığını açıqlayıb.

Seri hücumun “məzlum Fələstin xalqına dəstək və sionist düşmənin Qəzza zolağındakı qardaşlarımıza qarşı törətdiyi qırğınlara cavab olaraq” həyata keçirildiyini bildirib.

Seri verdiyi yazılı açıqlamada, “Silahlı Qüvvələrə bağlı raket qüvvələrimiz işğal altındakı Yafa bölgəsindəki Ben Gurion hava limanını hədəf alan ixtisaslı hərbi əməliyyat həyata keçirdi. Əməliyyatda “Fələstin 2″ tipli hipersonik ballistik raketdən istifadə edildi” dedi.

Mətbuat katibi əlavə edib ki, əməliyyat raket qüvvələri, dəniz qüvvələri və pilotsuz uçuş aparatı (PUA) elementləri tərəfindən həyata keçirilib və məqsədinə uğurla nail olub.

Seri, Yəmən Silahlı Qüvvələrinin ABŞ-ın hücumlarına beşinci gündür “təsirli və məsuliyyətli” cavab verməyə davam etdiyini bildirib və əlavə edib ki, ABŞ son saatlarda paytaxt Səna və bəzi digər vilayətlərdə mülki obyektləri və varlıqları hədəf alıb.

“Düşmən Amerika Qəzzadakı qardaşlarımıza qarşı törətdiyi qırğınlara cavab olaraq Yəmənin düşmən İsraili hədəf almasına mane ola bilməyəcək”, – Seri deyib.

O vurğulayıb ki, hava hücumlarının intensivləşdirilməsi Yəmən və yəmənliləri “məzlum Fələstin xalqına qarşı dini və mənəvi vəzifələrini yerinə yetirməkdən” çəkindirməyəcək.

Yəhya Seri əlavə edib ki, Yəmən Silahlı Qüvvələri “təcavüz dayandırılana və Qəzza zolağında Fələstin xalqına tətbiq olunan blokada aradan qaldırılana qədər Qəzzadakı qardaşlarımıza dəstəyini davam etdirəcək”.

Dünən gecə ABŞ-ın Yəmənə qarşı hücumları Səna, Cuf, Bayda və Səada əyalətlərini hədəfə alıb.

Hücumlarda 7 qadın və iki uşaq yaralanıb, çoxlu sayda evə ziyan dəyib. Bu hücumlar ABŞ prezidenti Donald Trampın Ənsarullah hərəkatını “tamamilə məhv edəcəyi” ilə hədələməsindən sonra baş verib.

Bu gün səhər saatlarında qərbdəki Hudeydə əyalətindəki pambıq fabriki və şimaldakı Səada əyalətinin əs-Safra bölgəsindəki əl-Əsəid bölgəsi yenidən hədəfə alınıb.

İsraillilərin sığınacaqlara qaçması nəticəsində 13 nəfər yaralanıb

İsrail təcili yardım xidməti bu gün səhər tezdən Təl-Əviv və ətraf ərazilərdə, Qüdsdə və işğal altındakı İordan çayının qərb sahilindəki yaşayış məntəqələrində sirenlərin səslənməsi nəticəsində sığınacaqlara qaçan israillilərin 13 nəfərin yaralandığını, 3 nəfərin isə panik hücumu keçirdiyini açıqlayıb.

İsrail mediası Yəməndən atılan raketlərə görə Tel-Əviv və Qüdsdə sirenlərin çalındığını bildirib.

İsrailin “Kanal 12” televiziyası sirenaların səslənməsindən sonra baş nazir Benyamin Netanyahunun parlament zalını tərk edərək sığınacağa getdiyini və Yəmən raketinin atılmasından sonra Ben Qurion hava limanında işlərin müvəqqəti dayandırıldığını bildirib.

İsrailin “Kanal 14” televiziyası Netanyahunun “Ənsarullah hərəkatının bədəlini ödəyəcəyi ilə” hədələdiyini bildirib.