Yəmən Prezident Administrasiyası: İsrailin Sənaya hücumu nəticəsində Baş nazir və nazirlər şəhid olub
Yəmən Prezident Administrasiyası bəyan edib ki, ötən cümə axşamı Sionist İsrailin paytaxt Sənaya endirdiyi hava zərbəsi nəticəsində “Dəyişiklik və İnkişaf Hökuməti”nin Baş naziri Əhməd Qalib ər-Ruhavi və bir sıra nazirlər şəhid olublar.
Rəsmi açıqlamada bildirilib ki, İsrail hücumu nazirlər kabinetinin icraat və fəaliyyətlərin müzakirə edildiyi işçi müşavirəsini hədəfə alıb. Zərbə nəticəsində bir çox nazirin yaralandığı, bəzilərinin vəziyyətinin orta, bəzilərinin isə ağır olduğu və hazırda reanimasiya şöbəsində saxlanıldığı qeyd olunub.
Açıqlamada deyilir:
“Milli liderlərimizin bir qisminin şəhadətə ucaldığını böyük Yəmən xalqına və İslam ümmətinə dərin kədər və hüznlə çatdırırıq. Lakin bu ağır itki dövlət qurumlarının xalqa xidmət missiyasını heç vaxt dayandırmayacaq.”
Prezident Administrasiyası vurğulayıb ki, şəhidlərin qanı xalq üçün “yolgöstərən və ruhlandırıcı mənbə” olacaq. Rəsmi bəyanatda hökumətin xalqa xidmət yolunda möhkəm qaldığı, Yəmən xalqı ilə bir daha əhdləşdiyi və dövlətin missiyasını Allahın izni ilə davam etdirəcəyi qeyd edilib.
Bəyanatda həmçinin Yəmən xalqının dözümlü və mübariz xarakterinə diqqət çəkilərək, Fələstin xalqına dəstəyin qətiyyətlə davam edəcəyi vurğulanıb. Ordunun isə bütün təhlükə və çətinliklərə qarşı gücləndirilərək daim hazırlıq vəziyyətində saxlanılacağı bildirilib.
