Amerika Yəməndə yeni hücumlar həyata keçirib

Beynəlxalq media mənbələri ABŞ-ın şənbə günü səhər birtərəfli qaydada Yəməndə növbəti hücumu həyata keçirdiyini iddia edib.

Əl-Məyadin xəbər kanalı şənbə günü səhər Yəmənin paytaxtı Sənanın şimal hissəsində güclü partlayış səsi eşidildiyini bildirib.

Bir az sonra Yəmənin Əl-Məsirə kanalı ABŞ və İngiltərənin Yəmənin paytaxtı Sənaya yenidən hücum etdiyini açıqlayıb. Buna baxmayaraq, Amerika mediası bu hücumun ABŞ tərəfindən birtərəfli qaydada həyata keçirildiyini iddia edib.

Əl-Məyadin şəbəkəsi Səna Beynəlxalq Hava Limanı yaxınlığındakı Əd-Deyləmi bazasına hava və ya raket hücumlarının həyata keçirildiyini bildirib.

ABŞ rəsmisi CNN-ə bildirib ki, Yəməndəki yeni hücumlarda Yəmənin Ənsarullah qüvvələrinin istifadə etdiyi radar obyekti hədəfə alınıb.

Rəsmi həmçinin bildirib ki, ABŞ ordusu hücumları birtərəfli qaydada həyata keçirib. NBC bu hücumun ABŞ Hərbi Dəniz Qüvvələrinin gəmisi tərəfindən həyata keçirildiyini iddia edib.

Cümə günü səhər Yəmən ordusunun Qırmızı dənizdə İsrail gəmiləri və Amerika qüvvələrinə qarşı əməliyyatlarına cavab olaraq ABŞ və İngiltərə təyyarə, gəmi və sualtı qayıqlarla Yəməndə 12-dən çox yeri hədəf alıb.

Amerika rəsmilərinin bildirdiyinə görə, bu hücumun hədəfi Yəmən Ənsarullahına məxsus təlim məntəqələri, hava bazaları və pilotsuz uçan aparatlara texniki xidmət obyektləri olub.

Bu hücumdan dərhal sonra Yəmənin Ənsarullah qüvvələri sulardakı düşmən mövqelərinə ballistik raketlər atdıqlarını açıqlayıb.

Hücumdan sonra HƏMAS, Fələstin İslami Cihadı və Fələstin Xalq Cəbhəsi də daxil olmaqla fələstinli qruplar Yəmən xalqını dəstəkləyərək raket hücumunu pisləyən bəyanat yayıblar.