BMT-nin baş katibi İsrailin Qəzzada yardım karvanı ətrafında gözləyən fələstinlilərə hücumunu pisləyib

BMT-nin baş katibi Antonio Quterreş cümə axşamı İsrail rejimi qüvvələrinin Qəzzanın şimalında fələstinli qaçqınlara yardım karvanı ətrafında toplaşanlara hücumunu pisləyib.

Birləşmiş Millətlər Təşkilatının sözçüsü Stefan Düjarrik yerli vaxtla cümə axşamı Antonio Quterreşin bəyanatını oxuyaraq əlavə edib: “BMT-nin baş katibi bu gün Qəzzanın şimalında yüzdən çox insanın həyati yardım alarkən öldüyü və ya yaralandığı hadisəni pisləyib. BMT-nin bir həftədən artıqdır ki, yardım göstərə bilmədiyi şimaldakı mülki vətəndaşlar da daxil olmaqla, ümidsiz Qəzza xalqının təcili yardıma ehtiyacı var”.

BMT sözçüsü bəyan edib: “BMT-nin Baş katibi Qəzzada indiyədək 30 mindən çox insanın ölümünə və 70 mindən çox insanın yaralanmasına səbəb olan münaqişənin faciəvi insan tələfatından dəhşətə gəlib. Təəssüf ki, dağıntılar altında naməlum sayda insan qalıb”.

Düjarrik vurğulayıb: “BMT-nin Baş katibi təcili humanitar atəşkəsə və bütün girovların qeyd-şərtsiz azad edilməsinə çağırıb. O, Qəzzaya həyati əhəmiyyət kəsb edən humanitar yardımın çatdırılması üçün bir daha təcili tədbirlər görməyə çağırıb”.