BMT TŞ-nın sədri Fələstinin təşkilata qəbulla bağlı müraciətinə baxılması prosesinə başlayıb

Aprel ayında BMT Təhlükəsizlik Şurasına (TŞ) sədrlik edən Malta Fələstinin dünya qurumuna qəbul üçün müraciətinə baxılması prosesinə başlayıb.

Bu barədə jurnalistlərə Fələstinin BMT-dəki daimi müşahidəçisi Riyad Mənsur məlumat verib.

O, jurnalistin müvafiq sualına cavabında deyib: “İnanıram ki, o, artıq bu prosesə başlayıb. Bizim BMT-nin 194-cü üzvü kimi qəbul olunmağımız böyük əhəmiyyət kəsb edir, ümid edirəm ki, bu, bu il baş verəcək”.

Mənsur qeyd edib ki, Fələstinin BMT-nin daimi üzvü olmaq təşəbbüsü dünya təşkilatının əksər ölkələri tərəfindən, xüsusən də Ərəb Liqası, İslam Əməkdaşlıq Təşkilatı və BMT-dəki ərəb qrupu tərəfindən dəstəklənib.

Fələstinin hazırda BMT-də daimi müşahidəçisi var. Bu statusa malik ölkələr əksər iclaslarda iştirak edə və demək olar ki, bütün müvafiq sənədlərə çıxış əldə edə bilsələr də, səsvermə hüququna malik deyillər.

Fələstindən başqa, yalnız Müqəddəs Taxt-Tac (Vatikan) BMT-də daimi müşahidəçi statusuna malikdir.

Ölkənin BMT-yə üzvlüyünə qəbulu prosesi, dünya təşkilatının saytında göstərildiyi kimi, Təhlükəsizlik Şurasının tövsiyəsi ilə Baş Assambleyanın qərarı ilə həyata keçirilir.

Təhlükəsizlik Şurasının tövsiyəsini almaq üçün qurumun daimi üzvlərindən heç birinin (Böyük Britaniya, Çin, Rusiya, ABŞ və Fransa) əleyhinə səs verməməsi şərti ilə, ölkənin müraciətinə Təhlükəsizlik Şurasının 15 üzvündən 9-u səs verməlidir.

Bundan sonra məsələ BMT Baş Assambleyasına təqdim edilir və burada ölkənin üzvlük üçün müraciəti səslərin üçdə ikisini almalıdır.